പ്രിയങ്ക ഗാന്ധിയുടെ മകൻ വിവാഹിതനാകുന്നു, സഫലമാകുന്നത് ഏഴുകൊല്ലത്തെ പ്രണയം

ന്യൂഡൽഹി: കോൺഗ്രസ് നേതാവും വയനാട് എം പിയുമായ പ്രിയങ്ക ഗാന്ധിയുടെയും ബിസിനസുകാരനായ റോബർട്ട് വാദ്രയുടെയും മകൻ റൈഹാൻ വാദ്രയുടെ വിവാഹനിശ്ചയം കഴിഞ്ഞു. ദീർഘകാലത്തെ കാമുകി അവീവ ബൈഗ് ആണ് വധു. ഡൽഹി സ്വദേശിനിയാണ്.

25കാരനായ റൈഹാൻ ഏഴുവർഷം മുൻപാണ് അവിവയോട് പ്രണയാഭ്യർത്ഥന നടത്തിയത്. തുടർന്ന് ഇരുകുടുംബങ്ങളും വിവാഹത്തിന് സമ്മതം മൂളുകയായിരുന്നു. റൈഹാൻ ഫോട്ടോഗ്രാഫറാണ്. പത്താം വയസുമുതലാണ് ഫോട്ടോഗ്രാഫിയിൽ കമ്പം തുടങ്ങിയത്. മികച്ച വൈൽഡ് ലൈഫ്, സ്‌ട്രീറ്റ്, കൊമേഷ്യൽ ഫോട്ടോഗ്രാഫർ കൂടിയാണദ്ദേഹം. 2021ൽ ഡൽഹിയിലെ ബിക്കാനീർ ഹൗസിൽ തന്റെ ആദ്യ ഫോട്ടോഗ്രാഫി പ്രദർശനം നടത്തിയതിന് മികച്ച പ്രതികരണങ്ങൾ ലഭിച്ചിരുന്നു.

റൈഹാന്റെ മുത്തച്ഛനും മുൻ പ്രധാനമന്ത്രിയുമായ രാജീവ് ഗാന്ധിക്കും ഫോട്ടോഗ്രാഫിയോട് വലിയ കമ്പമുണ്ടായിരുന്നു. അവീവ ബെയ്ഗും ഫോട്ടോഗ്രാഫറും നിർമ്മാതാവുമാണെന്നാണ് റിപ്പോർട്ടുകൾ.