കടൽക്കൊള്ളക്കാർ റാഞ്ചിയ കപ്പൽ നാവിക സേന മോചിപ്പിച്ചു: ഇന്ത്യക്കാരുൾപ്പെടെയുള്ള ജീവനക്കാരെ രക്ഷപ്പെടുത്തി

കടൽക്കൊള്ളക്കാർ തട്ടിക്കൊണ്ടുപോയ ലൈബീരിയൻ (liberian) പതാകയുള്ള കപ്പൽ ഇന്ത്യൻ നാവിക സേന (indian navy) രക്ഷപെടുത്തി. സൊമാലിയൻ (somalia) തീരത്ത് തകർന്ന ചരക്ക് കപ്പലിലെ 15 ഇന്ത്യക്കാർ ഉൾപ്പെടെ 21 ജീവനക്കാരെയും ഇന്ത്യൻ നാവികസേന രക്ഷപ്പെടുത്തി. എംവി ലീല നോർഫോക്ക് എന്ന ചരക്ക് കപ്പൽ അപകട സൂചന നൽകിയതിനെത്തുടർന്നാണ് നാവികസേനയുടെ യുദ്ധക്കപ്പലായ ഐഎൻഎസ് ചെന്നൈ രക്ഷാ പ്രവർത്തനത്തിന് പുറപ്പെട്ടത്.

നാവികസേനയുടെ എലൈറ്റ് മറൈൻ കമാൻഡോകൾ അല്ലെങ്കിൽ മാർക്കോസ് കപ്പലിൽ തിരച്ചിൽ നടത്തിയെങ്കിലും കടൽക്കൊള്ളക്കാരെ കണ്ടെത്താനായില്ല. എംവി ലീല നോർഫോക്ക് എന്ന കപ്പൽ ബ്രസീലിലെ പോർട്ട് ഡു അക്കോയിൽ നിന്ന് ബഹ്‌റൈനിലെ ഖലീഫ ബിൻ സൽമാനിലേക്ക് പോകുകയായിരുന്നു. ജനുവരി നാലിന് വൈകുന്നേരം അഞ്ചോ ആറോ അജ്ഞാതരായ സായുധ ഉദ്യോഗസ്ഥർ കപ്പലിൽ കയറിയെന്ന് വ്യാപാര കപ്പൽ യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് (യുകെഎംടിഒ) പോർട്ടലിന് സന്ദേശം അയച്ചെന്ന് ഇന്ത്യൻ നാവികസേനയുടെ പ്രസ്താവനയിൽ പറയുന്നു.

ഇന്ത്യൻ നാവികസേനയുടെ യുദ്ധക്കപ്പലായ ഐഎൻഎസ് ചെന്നൈ, മാരിടൈം പട്രോൾ എയർക്രാഫ്റ്റ് പി-8ഐ, ലോംഗ് റേഞ്ച് പ്രിഡേറ്റർ എംക്യു9ബി ഡ്രോൺ എന്നിവ കപ്പലിനെ സഹായിക്കാൻ വിന്യസിച്ചിരുന്നു. ഐ‌എൻ‌എസ് ചെന്നൈ അവരുടെ ആന്റി പൈറസി പട്രോളിംഗിൽ നിന്ന് വഴിതിരിച്ചുവിടുകയും ഉച്ചകഴിഞ്ഞ് 3.15 ന് വടക്കൻ അറബിക്കടലിൽ വച്ച് കപ്പലിനെ തടയുകയും ചെയ്യുകയായിരുന്നു.

വെള്ളിയാഴ്ച രാവിലെ നാവികസേനയുടെ വിമാനം കപ്പലുമായി ബന്ധം സ്ഥാപിച്ചു. തുടർന്ന് നാവികസേന ചരക്ക് കപ്പലിൽ രക്ഷാ പ്രവർത്തനങ്ങൾ നടത്തുകയും ജീവനക്കാരെ രക്ഷപ്പെടുത്തുകയും ചെയ്തു. ഇന്ത്യൻ നാവികസേനയുടെ മാരിടൈം പട്രോൾ എയർക്രാഫ്റ്റ് യുദ്ധക്കപ്പൽ പിടികൂടുമെന്ന ശക്തമായ മുന്നറിയിപ്പ് നൽകിയിരുന്നു. ഇതോടെയാണ് കടൽക്കൊള്ളക്കാർ ഹൈജാക്ക് ചെയ്യാനുള്ള ശ്രമം ഉപേക്ഷിച്ചതെന്ന് നാവികസേന പ്രസ്താവനയിൽ പറഞ്ഞു.

“ഐ‌എൻ‌എസ് ചെന്നൈ എം‌വിയുടെ സമീപത്താണ്, വൈദ്യുതി ഉൽ‌പാദനവും പ്രൊപ്പൽ‌ഷനും പുനഃസ്ഥാപിക്കുന്നതിനും അടുത്ത തുറമുഖത്തേക്ക് യാത്ര ആരംഭിക്കുന്നതിനും പിന്തുണ നൽകുന്നു.” – പ്രസ്താവന കൂട്ടിച്ചേർത്തു. കഴിഞ്ഞ വർഷം ഡിസംബർ 23 ന് 21 ഇന്ത്യൻ ജീവനക്കാരുമായി ലൈബീരിയൻ പതാക ഘടിപ്പിച്ച എംവി ചെം പ്ലൂട്ടോ എന്ന കപ്പൽ ഇന്ത്യയുടെ പടിഞ്ഞാറൻ തീരത്ത് വച്ച് ഡ്രോൺ ആക്രമണ ത്തിന് ഇരയായിരുന്നു. എംവി ചെം പ്ലൂട്ടോയെ കൂടാതെ, ഇന്ത്യയിലേക്കുള്ള യാത്രയിലായിരുന്ന മറ്റൊരു വാണിജ്യ എണ്ണ ടാങ്കറും അതേ ദിവസം തെക്കൻ ചെങ്കടലിൽ ഡ്രോൺ ആക്രമണത്തിന് ഇരയായി. 25 ഇന്ത്യൻ ജീവനക്കാരുടെ സംഘമാണ് കപ്പലിലുണ്ടായിരുന്നത്.