പശ്ചിമേഷ്യൻ സംഘർഷം; ഇറാനിലെ ഇന്ത്യൻ പൗരന്മാർ ജാഗ്രത പാലിക്കണമെന്ന് എംബസി, ഈ നമ്പറുകളിൽ ബന്ധപ്പെടാം

ടെഹ്‌റാൻ: പശ്ചിമേഷ്യയിൽ ഇസ്രയേൽ ഇറാൻ സംഘർഷം രൂക്ഷമാകുന്ന സാഹചര്യത്തിൽ ഇറാനിലെ ഇന്ത്യൻ പൗരന്മാർക്കായി ഹെൽപ്പ്‌ലൈൻ നമ്പറുകൾ നൽകി എംബസി. ഇറാനിലുള്ള ഇന്ത്യൻ പൗരന്മാരുമായുള്ള ആശയവിനിമയത്തിനായി ടെലിഗ്രാം ലിങ്കും ഇന്ത്യൻ എംബസി എക്‌സിൽ പങ്കുവച്ചു.

‘ഇറാനിലെ ഇന്ത്യക്കാർ ഇന്ത്യൻ എംബസിയിൽ നിന്ന് സ്ഥിതിഗതികളെക്കുറിച്ചുള്ള അപ്‌ഡേറ്റുകൾ ലഭിക്കുന്നതിന് ഈ ലിങ്കിൽ ചേരണമെന്ന് അഭ്യർഥിക്കുന്നു – https://t.me/indiansiniran എന്ന് എംബസി എക്സിൽ കുറിച്ചു.

ഇറാനിലുള്ള ഇന്ത്യൻ പൗരന്മാർക്ക് മാത്രമാണ് ഈ ലിങ്കെന്നും ഇവർ വ്യക്തമാക്കി. പരിഭ്രാന്തരാകരു തെന്നും ജാഗ്രത പാലിക്കണമെന്നും ടെഹ്‌റാനിലെ എംബസിയുമായി സമ്പർക്കം പുലർത്തണമെന്നും എംബസി പൗരന്മാരോട് ആവശ്യപ്പെട്ടു.

ഇറാനിലെ അനാവശ്യമായ എല്ലാ നീക്കങ്ങളും ഒഴിവാക്കണമെന്നും അപ്‌ഡേറ്റുകൾക്കായി എംബസിയുടെ സോഷ്യൽ മീഡിയ പേജുകൾ പിന്തുടരണമെന്നും ഇന്ത്യക്കാരോട് എംബസി ആവശ്യപ്പെട്ടു. ആശയവിനിമയത്തിനായി നിരവധി കോൺടാക്റ്റ് നമ്പറുകളും എംബസി നൽകി.