നിയമസഭാ തിരഞ്ഞെടുപ്പിനൊരുങ്ങി യുഡിഎഫ്; ഫെബ്രുവരിയിൽ വിഡി സതീശന്‍റെ നേതൃത്വത്തിൽ കേരളയാത്ര

തദ്ദേശ സ്വയംഭരണ തിരഞ്ഞെടുപ്പിലെ വൻ വിജയത്തിന് പിന്നാലെ വരാനിരിക്കുന്ന നിയമസഭാ തിര ഞ്ഞെടുപ്പിനായുള്ള പ്രവർത്തനങ്ങൾ യുഡിഎഫ് ഊർജ്ജിതമാക്കി. ഇതിന്റെ ഭാഗമായി ഫെബ്രുവരി ആദ്യവാരം പ്രതിപക്ഷ നേതാവ് വിഡി സതീശന്റെ നേതൃത്വത്തിൽ സംസ്ഥാന വ്യാപകമായി കേരളയാത്ര നടത്താൻ യുഡിഎഫ് തീരുമാനിച്ചു. കാസർകോട് നിന്ന് ആരംഭിച്ച് തിരുവനന്തപുരത്ത് അവസാനിക്കുന്ന രീതിയിലാണ് യാത്ര ക്രമീകരിച്ചിരിക്കുന്നത്.

മുന്നണിയുടെ അടിത്തറ വിപുലീകരിക്കുന്നതിന്റെ ഭാഗമായി മുൻ എംഎൽഎ പിവി അൻവർ നേതൃത്വം നൽകുന്ന ഓൾ ഇന്ത്യ തൃണമൂൽ കോൺഗ്രസ് കേരള ഘടകത്തെയും സി കെ ജാനുവിന്റെ ജനാധിപത്യ രാഷ്ട്രീയ സഭയെയും അസോസിയേറ്റ് അംഗങ്ങളായി യുഡിഎഫിൽ ഉൾപ്പെടുത്തിയിട്ടുണ്ട്. കൊച്ചിയിൽ ചേർന്ന യുഡിഎഫ് യോഗത്തിലാണ് ഈ തീരുമാനങ്ങൾ ഉണ്ടായത്.

ഫെബ്രുവരിയിലെ കേരളയാത്രയ്ക്ക് മുൻപായി മുന്നണിയുടെ തിരഞ്ഞെടുപ്പ് പ്രകടനപത്രിക (Manifesto) പുറത്തിറക്കും. ഈ മാനിഫെസ്റ്റോയിലെ വികസന കാഴ്ചപ്പാടുകൾ ജനങ്ങളിലെത്തിക്കുക എന്നതാണ് യാത്രയുടെ പ്രധാന ലക്ഷ്യം. ജനുവരി മാസത്തോടെ ഘടകകക്ഷികളുമായുള്ള ഉഭയകക്ഷി ചർച്ചകൾ പൂർത്തിയാക്കി സ്ഥാനാർത്ഥി നിർണ്ണയത്തിലേക്ക് കടക്കാനാണ് യുഡിഎഫ് ലക്ഷ്യമിടുന്നത്.’

തദ്ദേശ തിരഞ്ഞെടുപ്പിലുണ്ടായ ജനവികാരം നിയമസഭാ തിരഞ്ഞെടുപ്പിലും പ്രതിഫലിക്കുമെന്ന് പ്രതിപ ക്ഷ നേതാവ് വിഡി സതീശൻ പറഞ്ഞു. കേരളത്തെ നിലവിലെ അവസ്ഥയിൽ നിന്ന് മാറ്റുന്നതിനുള്ള സമഗ്രമായ വികസന പദ്ധതികൾ മാനിഫെസ്റ്റോയിൽ ഉൾപ്പെടുത്തുമെന്നും ഇത് രാഷ്ട്രീയ പ്രചാരണ ത്തേക്കാൾ ഉപരി കേരളത്തിന്റെ വികസനത്തിനായുള്ള യാത്രയായിരിക്കുമെന്നും അദ്ദേഹം കൂട്ടിച്ചേർത്തു.

അതേസമയം, 2025-ലെ തദ്ദേശ തിരഞ്ഞെടുപ്പിലെ പാർട്ടി തിരിച്ചുള്ള വോട്ട് വിഹിതം സംസ്ഥാന തിരഞ്ഞെടുപ്പ് കമ്മീഷൻ പുറത്തുവിട്ടു. 29.17% വോട്ട് വിഹിതവുമായി കോൺഗ്രസ് ആണ് ഏറ്റവും വലിയ പാർട്ടിയായി മാറിയത്. സിപിഐഎം 27.16% വോട്ടുമായി രണ്ടാം സ്ഥാനത്തും ബിജെപി 14.76% വോട്ടുമായി മൂന്നാം സ്ഥാനത്തുമുണ്ട്.

മുസ്ലിം ലീഗ് 9.77% വോട്ട് വിഹിതം നേടി. മുന്നണി അടിസ്ഥാനത്തിൽ പരിശോധിക്കുമ്പോൾ യുഡിഎഫ് 38.81% വോട്ട് നേടി ഒന്നാമതെത്തി. എൽഡിഎഫ് 33.45 ശതമാനവും എൻഡിഎ 14.71 ശതമാനവും വോട്ടുകളാണ് നേടിയത്. വോട്ട് വിഹിതത്തിലുണ്ടായ ഈ വർദ്ധനവ് വരാനിരിക്കുന്ന നിയമസഭാ തിരഞ്ഞെടുപ്പിൽ വലിയ ആത്മവിശ്വാസമാണ് യുഡിഎഫിന് നൽകുന്നത്.