ജസീറ എയർവേസ് അൽ-ഖൈസൂമയിലെത്തി; കുവൈറ്റിൽ നിന്നുള്ള ആദ്യ വിമാനത്തിന് ആവേശകരമായ സ്വീകരണം

ഹാഫർ അൽ-ബാത്തിൻ: സൗദി അറേബ്യയിലെ അൽ-ഖൈസൂമ ഗവർണറേറ്റിലുള്ള അൽ-ഖൈസൂമ അന്താരാഷ്ട്ര വിമാനത്താവളത്തിലേക്ക് കുവൈറ്റിൽ നിന്നുള്ള ആദ്യ ജസീറ എയർവേസ് വിമാനം എത്തിച്ചേർന്നു. ഹാഫർ അൽ-ബാത്തിൻ പ്രവിശ്യയെ കുവൈറ്റുമായി ബന്ധിപ്പിക്കുന്ന പുതിയ വിമാന സർവീസിനാണ് ഇതോടെ തുടക്കമായത്.

കുവൈറ്റ് സിറ്റിയിൽ നിന്ന് പുറപ്പെട്ട വിമാനം അൽ-ഖൈസൂമ വിമാനത്താവളത്തിൽ ലാൻഡ് ചെയ്ത പ്പോൾ വാട്ടർ സല്യൂട്ട് നൽകിയും പൂക്കളും മധുരപലഹാരങ്ങളും വിതരണം ചെയ്തുമാണ് അധികൃതർ വരവേറ്റത്.കുവൈറ്റിലെ പ്രമുഖ വിമാനക്കമ്പനിയായ ജസീറ എയർവേസിന്റെ അൽ-ഖൈസൂമ യിലേക്കുള്ള കന്നിയാത്രയാണിത്.

ഹാഫർ അൽ-ബാത്തിൻ പ്രവിശ്യയിലെ യാത്രക്കാർക്ക് കുവൈറ്റിലേക്കും മറ്റ് അന്താരാഷ്ട്ര ലക്ഷ്യ സ്ഥാനങ്ങളിലേക്കും എളുപ്പത്തിൽ യാത്ര ചെയ്യാൻ ഈ സർവീസ് സഹായകമാകും.സൗദിയും കുവൈറ്റും തമ്മിലുള്ള സാമ്പത്തിക-സാംസ്കാരിക ബന്ധങ്ങൾക്കും വിനോദസഞ്ചാര മേഖലയ്ക്കും ഈ പുതിയ റൂട്ട് വലിയ ഊർജ്ജം പകരും.

നിശ്ചയിച്ച സമയത്തേക്കാൾ അല്പം വൈകിയാണ് ആദ്യ വിമാനം എത്തിയതെങ്കിലും യാത്രക്കാർക്ക് മികച്ച സൗകര്യങ്ങളാണ് വിമാനത്താവളത്തിൽ ഒരുക്കിയിരുന്നത്. വരും ദിവസങ്ങളിൽ കൃത്യസമയ ത്തുള്ള ഷെഡ്യൂളുകൾ ലഭ്യമാക്കുമെന്ന് അധികൃതർ അറിയിച്ചു.