ഇന്ത്യയില് വിവാഹേതര ബന്ധങ്ങള് ഏറ്റവും കൂടുതലുള്ള ഇന്ത്യന് സംസ്ഥാനം ഇതാണ്; പട്ടിക അറിയാം
ന്യൂസ് ബ്യൂറോ തിരുവനന്തപുരം 
ഐജി പി വിജയന്റെ സസ്പെന്ഷന് റദ്ദാക്കി ഉത്തരവ് പുറത്ത്. സര്വ്വീസില് തിരിച്ചെടുത്തെങ്കിലും പി വിജയനെതിരായ വകുപ്പുതല അന്വേഷണം തുടരും. മുഖ്യമന്ത്രിയാണ് ഇത് സംബന്ധിച്ച ഉത്തരവിറക്കിയത്. എലത്തൂര് ട്രെയിന് തീവെയ്പ്പ് കേസിലെ പ്രതിയുടെ യാത്രാ വിവരങ്ങള് ചോര്ത്തി എന്ന് ആരോപിച്ചായിരുന്നു പി വിജയനെ സസ്പെന്ഡ് ചെയ്തത്.
മെയ് 18ന് ആണ് വിജയനെ സസ്പെന്ഡ് ചെയ്തത്. ക്രമസമാധാന ചുമതലയുള്ള എഡിജിപി എം ആര് അജിത് കുമാറിന്റെ റിപ്പോര്ട്ടിന്റെ അടിസ്ഥാനത്തിലായിരുന്നു നടപടി. വിജയനോട് വിശദീകരണം പോലും ചോദിക്കാതെയായിരുന്നു ഈ നടപടി. കഴിഞ്ഞ അഞ്ചുമാസമായി അദ്ദേഹത്തെ ചുമതലകളില് നിന്നും മാറ്റി നിര്ത്തിയിരിക്കുകയാണ്. ഇതിനിടെ സസ്പെന്ഷന് അടിസ്ഥാനമായ കാരണങ്ങള് കളവാണെന്ന് ചൂണ്ടിക്കാണിച്ച് വിജയന് സര്ക്കാരിന് മറുപടി നല്കി.
നേരത്തെ ഐജി പി വിജയന്റെ സസ്പെന്ഷന് അവലോകനം ചെയ്യാന് നാലംഗ സമിതിയെ ചുമതലപ്പെടുത്തിയിരുന്നു. ഐപിഎസ് ഉദ്യോഗസ്ഥരെ സസ്പെന്ഡ് ചെയ്താല് മൂന്നു മാസം തികയുമ്പോള് അവലോകനം നടത്തണമെന്ന ചട്ടത്തിന്റെ അടിസ്ഥാനത്തിലായിരുന്നു സര്ക്കാര് സമിതിയെ നിയോഗിച്ചത്. ഈ സമിതി വിജയനെ തിരിച്ചെടുക്കാനും വകുപ്പ്തല നടപടി തുടരാനും ശുപാര്ശ ചെയ്തിരുന്നു. എന്നാല് അനുകൂലനടപടിയുണ്ടായില്ല.
ചീഫ് സെക്രട്ടറി ഡോ. വി വേണു, അഡീഷനല് ചീഫ് സെക്രട്ടറിമാരായ ശാരദ മുരളീധരന്, ബിശ്വനാഥ് സിന്ഹ, കെ ആര് ജ്യോതിലാല് എന്നിവരായിരുന്നു സമിതി അംഗങ്ങള്. എന്നാല് ചീഫ് സെക്രട്ടറി ചെയര്മാനായ നാലംഗ കമ്മിറ്റിയില് സംസ്ഥാന പൊലീസ് മേധാവിയെ ഉള്പ്പെടുത്തിയിരുന്നില്ല. ഇത് വലിയ വിവാദമായിരുന്നു.
