അൽ-അഖ്‌സയിൽ പ്രവേശന വിലക്ക്: ഇസ്രായേൽ നടപടിക്കെതിരെ എട്ട് രാഷ്ട്രങ്ങളുടെ വിദേശകാര്യ മന്ത്രിമാർ

റിയാദ്: വിശുദ്ധ റമദാൻ മാസത്തിൽ ജെറുസലേമിലെ അൽ-അഖ്‌സ പള്ളിയിലേക്കും (അൽ-ഖുദ്‌സ് അൽ-ഷരീഫ്) അതിന്റെ കവാടങ്ങളിലേക്കും മുസ്ലീം വിശ്വാസികൾക്ക് പ്രവേശനം നിഷേധിക്കുന്ന ഇസ്രായേൽ അധികൃതരുടെ നടപടിയെ എട്ട് പ്രമുഖ മുസ്ലീം രാഷ്ട്രങ്ങൾ ശക്തമായി അപലപിച്ചു. സൗദി അറേബ്യ, ജോർദാൻ, യുണൈറ്റഡ് അറബ് എമിറേറ്റ്സ് (UAE), ഖത്തർ, ഇന്തോനേഷ്യ, പാകിസ്ഥാൻ, ഈജിപ്ത്, തുർക്കി എന്നീ രാജ്യങ്ങളുടെ വിദേശകാര്യ മന്ത്രിമാരാണ് സംയുക്ത പ്രസ്താവനയിലൂടെ തങ്ങളുടെ പ്രതിഷേധം അറിയിച്ചത്.

റമദാൻ മാസത്തിൽ വിശ്വാസികൾക്ക് പള്ളിയിലേക്ക് പ്രവേശനം തടയുന്നത് മതസ്വാതന്ത്ര്യത്തി ന്മേലുള്ള നഗ്നമായ ലംഘനമാണെന്ന് മന്ത്രിമാർ ചൂണ്ടിക്കാട്ടി.ഇസ്രായേലിന്റെ ഇത്തരം പ്രകോപനപരമായ നടപടികൾ മേഖലയിൽ കൂടുതൽ അസ്ഥിരതയ്ക്കും സംഘർഷങ്ങൾക്കും കാരണമാകുമെന്ന് രാജ്യങ്ങൾ മുന്നറിയിപ്പ് നൽകി.

അൽ-അഖ്‌സ പള്ളിയുടെ ചരിത്രപരവും നിയമപരവുമായ പദവി നിലനിർത്തണമെന്നും വിശുദ്ധ സ്ഥലങ്ങളുടെ പവിത്രത കാത്തുസൂക്ഷിക്കണമെന്നും പ്രസ്താവന ആവശ്യപ്പെടുന്നു.അന്താരാഷ്ട്ര നിയമങ്ങളെയും മാനുഷിക മൂല്യങ്ങളെയും വെല്ലുവിളിക്കുന്ന ഇത്തരം നടപടികളിൽ നിന്ന് ഇസ്രായേൽ അധികൃതർ പിന്തിരിയണമെന്നും, വിശ്വാസികൾക്ക് തടസ്സമില്ലാതെ ആരാധന നടത്താനുള്ള സൗകര്യം ഒരുക്കണമെന്നും വിദേശകാര്യ മന്ത്രിമാർ ആവശ്യപ്പെട്ടു. പലസ്തീൻ വിഷയത്തിൽ മുസ്ലീം ലോകത്തിന്റെ ഐക്യദാർഢ്യം വ്യക്തമാക്കുന്നതാണ് ഈ സംയുക്ത നീക്കം.