ആകാശം കീഴടക്കാൻ: എ 320 നിയോ ഇനത്തിൽ പെട്ട 30 വിമാനങ്ങൾ വാങ്ങാൻ സൗദിയിലെ സ്വകാര്യ ബജറ്റ് വിമാന കമ്പനിയായ ഫ്ളൈ നാസ്; കരാർ ഒപ്പുവെച്ചത് പാരീസ് എയർ ഷോക്കിടെ.


ജിദ്ദ : 1,400 കോടിയിലേറെ റിയാലിന്റെ ഇമുതൽ മുടക്കിൽ എയർബസ് കമ്പനിയിൽ നിന്ന് എ 320നിയോ ഇനത്തിൽ പെട്ട 30 വിമാനങ്ങൾ വാങ്ങാൻ സൗദിയിലെ സ്വകാര്യ ബജറ്റ് വിമാന കമ്പനിയായ ഫ്ളൈ നാസ് പാരീസ് എയർ ഷോക്കിടെ കരാർ ഒപ്പുവെച്ചു.

ഗതാഗത, ലോജിസ്റ്റിക് സർവീസ് മന്ത്രി എൻജിനീയർ സ്വാലിഹ് അൽജാസിർ, ജനറൽ അതോറിറ്റി ഒാഫ് സിവിൽ ഏവിയേഷൻ പ്രസിഡന്റ് അബ്ദുൽ അസീസ് അൽദു അയ്ലിജ്, ഫ്ളൈ നാസ് ചെയർമാൻ ആയിദ് അൽജുഅയ്ദ്, ഫ്ളൈ നാസ് സി.ഇ.ഒയും എം.ഡിയുമായ ബന്ദർ അൽമുഹന്ന, എയർബസ് ചീഫ് കൊമേഴ്സ്യൽ ഒാഫീസർ ക്രിസ്റ്റ്യൻ ഷരീർ എന്നിവർ കരാര് ഒപ്പ് വെക്കൽ ചടങ്ങിൽ സന്നിഹിതരായിരുന്നു. 

എയർബസ് എ3 20 നിയോ ഇനത്തിൽ പെട്ട ഏതാനും പുതിയ വിമാനങ്ങൾ അടുത്തിടെ ഫ്ളൈ നാസ് സ്വീകരിച്ചിരുന്നു. ഈ വർഷം എയർബസ് എ 320 നിയോ ഇനത്തിൽ പെട്ട 19 പുതിയ വിമാനങ്ങൾ ഫ്ളൈ നാസിന് ലഭിക്കുമെന്നാണ് പ്രതീക്ഷിക്കുന്നത്.

നിലവിൽ ഇൗയിനത്തിൽ പെട്ട 32 വിമാനങ്ങൾ ഫ്ളൈ നാസ് സർവീസിന് ഉപയോഗിക്കുന്നു. ഫ്ളൈ നാസിന് കീഴിൽ ആകെ 49 വിമാനങ്ങളാണുള്ളത്. ഇതിൽ മൂന്നിൽ രണ്ടും എയർബസ് എ320നിയോ ഇനത്തിൽ പെട്ടവയാണ്. എയർബസ് എ320സിയോ ഇനത്തിൽ പെട്ട 13 വിമാനങ്ങളും വീതി കൂടിയ എയർബസ് എ330 ഇനത്തിൽ പെട്ട നാലു വിമാനങ്ങളും ഫ്ളൈ നാസ് സർവീസിന് ഉപയോഗിക്കുന്നു.

ആകെ 3,200 കോടി റിയാൽ ചെലവഴിച്ച് എയർബസ് കമ്പനിയിൽ നിന്ന് 120 വിമാനങ്ങൾ വാങ്ങാനുള്ള ഒാർഡറിന്റെ ഭാഗമായാണ് 30 വിമാനങ്ങൾക്കുള്ള പുതിയ കരാർ ഒപ്പുവെച്ചതെന്ന് ഫ്ളൈ നാസ് സി.ഇ.ഒ ബന്ദർ അൽമുഹന്ന പറഞ്ഞു. പുതിയ വിമാനങ്ങൾക്കുള്ള ഒാർഡറുകൾ 250 വിമാനങ്ങളായി ഉയർത്താൻ കമ്പനി ഡയറക്ടർ ബോർഡ് അനുമതി നൽകിയിട്ടുണ്ട്.

ദേശീയ വ്യോമയാന തന്ത്രത്തിന് അനുസൃതമായി വളർച്ചാ, വിപുലീകരണ തന്ത്രം നടപ്പാക്കുന്നതുമായി മുന്നോട്ടുപോകാൻ കമ്പനി പ്രതിജ്ഞാബദ്ധമാണ്. 2030 ഒാടെ ലോകത്തെ 250 ലേറെ നഗരങ്ങളുമായി സൗദി അറേബ്യയെ ബന്ധിപ്പിക്കാനും പ്രതിവർഷ വിമാന യാത്രക്കാരുടെ എണ്ണം 33 കോടിയായി ഉയർത്താനും ദേശീയ വ്യോമയാന തന്ത്രം ലക്ഷ്യമിടുന്നു. ലോകത്തെ ഏറ്റവും മികച്ച പത്തു ബജറ്റ് വിമാന കമ്പനികളിൽ ഒന്നായി മാറാനാണ് ഫ്ളൈ നാസ് ശ്രമിക്കുന്നതെന്നും ബന്ദർ അൽമുഹന്ന പറഞ്ഞു.

ലോകത്തിലെ ഏറ്റവും പുതിയതും ഇന്ധനക്ഷമതയുള്ളതുമായ ഒറ്റ ഇടനാഴി വിമാന മാണ് എയർബസ് എ320നിയോ. വളർച്ചാ, വിപുലീകരണ പദ്ധതിയുമായി മുന്നോട്ടു പോകുന്നതോടെ തന്നെ സുസ്ഥിരതാ, പരിസ്ഥിതി സംരക്ഷണ മേഖലയിൽ ഫ്ളൈ നാസിന്റെ പ്രകടനം മെച്ചപ്പെടുത്താനും പുതിയ വിമാനനിര സഹായിക്കും. സൗദി യിലും വിദേശങ്ങളിലും ഫ്ളൈ നാസ് സർവീസുള്ള നഗരങ്ങളുടെ എണ്ണം 165 ആയി ഉയർത്താൻ കമ്പനിയുടെ വളർച്ചാ, വിപുലീകരണ പദ്ധതി ലക്ഷ്യമിടുന്നു.

നിലവിൽ സൗദിയിലെയും വിദേശങ്ങളിലെയും 70 ലേറെ നഗരങ്ങളിലേക്ക് ഫ്ളൈ നാസ് സർവീസുകൾ നടത്തുന്നു. 2007 ൽ സ്ഥാപിതമായ ശേഷം ഫ്ളൈ നാസ് വിമാന ങ്ങളിൽ ആറു കോടിയിലേറെ പേർ യാത്ര ചെയ്തിട്ടുണ്ട്.


Read Previous

സൗദി വിദേശകാര്യ മന്ത്രി ഇറാനില്‍; 2016ന് ശേഷം ആദ്യമായിട്ടാണ് ഒരു സൗദി മന്ത്രി ഇറാനിലെത്തുന്നത്; എംബസി ഉടന്‍ തുറക്കും, യമനില്‍ നിന്ന് സൗദിയിലേക്ക് ഹജ്ജ് വിമാനം

Read Next

ഹജ്ജ് 2023: ജവാസാത്ത് അഡ്മിനിസ്ട്രേറ്റീവ് കമ്മിറ്റി കേന്ദ്രങ്ങളിൽ ജവാസാത്ത് മേധാവി ജനറൽ സുലൈമാൻ അൽയഹ്യ സന്ദർശനം നടത്തി.

Leave a Reply

Your email address will not be published. Required fields are marked *

Most Popular

Translate »