മുംബയ്: പ്രശസ്ത പിന്നണി ഗായിക ശ്രേയാ ഘോഷാൽ തന്റെ മകന്റെ ചിത്രങ്ങൾ ഇൻസ്റ്റാഗ്രാമിൽ പങ്കുവച്ചു. ഇത് ആദ്യമായാണ് ശ്രേയ മകന്റെ ചിത്രങ്ങൾ സമൂഹമാദ്ധ്യമത്തിൽ പങ്കുവയ്ക്കുന്നത്. ഭർത്താവിനും മകനുമൊപ്പമുളള ചിത്രം അടിക്കുറിപ്പോടു കൂടെയാണ് ഗായിക പങ്കുവച്ചിരിക്കുന്നത്. മകന് ‘ദേവ്യാൻ മുഖോപാധ്യായ’ എന്ന് പേരിട്ടതായും ശ്രേയ അറിയിച്ചു.’ജീവിതത്തിന്റെ ദാനം’ എന്നാണ് ശ്രേയ തന്റെ കുഞ്ഞിനെ ചിത്രത്തിൽ വിശേഷിപ്പിച്ചിരിക്കുന്നത്.
തന്റെ കുഞ്ഞിനെ ആദ്യംകണ്ടപ്പോൾ ഒരു അമ്മയ്ക്കും അച്ഛനും മാത്രം മനസ്സിലാകുന്ന സന്തോഷം തങ്ങളുടെ ഹൃദയത്തിൽ നിറഞ്ഞുവെന്നും ഇപ്പോഴും ഇതൊരു സ്വപ്നം പോലെ തോന്നുന്നു എന്നും ശ്രേയ പറയുന്നു.
മെയ് 22നാണ് ശ്രേയാഘോഷാലിനും ശിലാദിത്യയ്ക്കും ഒരു ആൺകുഞ്ഞ് പിറന്നത്. ശ്രേയയുടെ പോസ്റ്റിനുതാഴെ സന്തോഷം പങ്കുവച്ച് നിരവധി പ്രമുഖർ എത്തി. ലോകത്തിന് മുഴുവൻ കുഞ്ഞ് പ്രകാശം പരത്തട്ടെ എന്ന് ബോളിവുഡ് അഭിനേത്രി ദിയാ മിർസ കമന്റ് ചെയ്തു.