ന്യൂസ് ബ്യൂറോ തൃശ്ശൂർ 
വാടകവീട്ടിൽ നിന്നും ഇറക്കിവിട്ടതിനെ തുടർന്ന് രണ്ട് സ്ത്രീകളും ഭിന്നശേഷി ക്കാരനും അടങ്ങുന്ന നാലംഗ കുടുംബം കഴിയുന്നത് തേക്കിൻകാട് മൈതാനിയിൽ. തൃശൂർ നെല്ലിശ്ശേരി ജിബി പോളിയും കുടുംബവുമാണ് കഴിഞ്ഞ 16 ദിവസമാണ് തെരുവിൽ കഴിയുന്നത്. വീട്ടുസാധാനങ്ങളും മകളുടെ സർട്ടിഫിക്കറ്റ് അടക്കമുള്ള രേഖകളും വീട്ടുടമ തങ്ങളുടെ സമ്മതമില്ലാതെ മറ്റൊരിടത്തേക്ക് മാറ്റിയതായും കുടുംബം ആരോപിച്ചു.
കഴിഞ്ഞ 16 ദിവസമായി തേക്കിൻകാട് മൈതാനമാണ് ഒളരി സ്വദേശിയായ ജിബിയു ടെയും മക്കളായ എൽന എമിൽ എന്നിവരുടെയും വീട്. പെരിങ്ങാവ് ഗാന്ധി നഗറിലെ വാടകവീട്ടിൽ നിന്ന് ഇവരെ ഉടമസ്ഥർ ഇറക്കി വിട്ടതിനെ തുടർന്നാണ് ജിബിക്കും മക്കൾക്കും തെരുവിലേക്ക് ഇറങ്ങേണ്ടിവന്നത്.
ഭർത്താവ് ഉപേക്ഷിച്ച ജിബിക്കും കുടുംബത്തിനും ആശ്രമായിരുന്ന കുടുംബ സുഹൃത്ത് ഗിരീഷും ഇവർക്കൊപ്പം തെരുവിലാണ് ഇപ്പോൾ. വീട്ടുസാധനങ്ങളും മെഡിക്കൽ വിദ്യാർത്ഥിനിയായ എൽനയുടെയും ഭിന്നശേഷിക്കാരനായ സഹോദരൻ എമിലി ന്റെയും പഠന സർട്ടിഫിക്കറ്റുകളും മറ്റും കുടുംബമറിയാതെ മറ്റൊരു സ്ഥലത്തേക്കു മാറ്റിയായിരുന്നു കുടിയൊഴിപ്പിക്കൽ. വാടകവീടിന്റെ ഉടമസ്ഥന്റെ ഭാഗത്ത് നിന്നും മോശം പെരുമാറ്റം ഉണ്ടായിട്ടുണ്ടെന്നും എന്നാൽ വാടകയിനത്തിൽ കുടിശ്ശിക ഇല്ലെന്നും ജിബി പറഞ്ഞു.
പാരാ മെഡിക്കൽ വിദ്യാർഥിയായിരുന്ന എൽനയ്ക്ക് അടുത്തിടെ ബെംഗളൂരുവിൽ ജോലി ലഭിച്ചിരുന്നു. ജോലി കിട്ടിയതു പറയാൻ ബന്ധുവീട്ടിലേക്കു പോകുന്നതിനിടെ വാഹനാപകടത്തിൽ എൽനയ്ക്കു സാരമായി പരുക്കേറ്റതിനെ തുടർന്നുള്ള ആശുപത്രി വാസത്തിനിടെയാണ് വീടൊഴിപ്പിക്കൽ. വിയ്യൂർ പൊലീസിലും കലക്ടറുടെ ഓഫി സിലും പരാതി നൽകിയെങ്കിലും ഇതുവരെ നടപടിയുണ്ടായില്ലെന്നു കുടുംബം പറയുന്നു.
ജീവിത പ്രതിസന്ധികൾക്കിടെ പ്രവീകൺ റാണയുടെ സേഫ്‌ ആൻഡ് സ്‌ട്രോങ് നിക്ഷേപ തട്ടിപ്പിലും കുടുംബം പെടുകയും 15 ലക്ഷം നഷ്ടമാവുകയും ചെയ്തു. പ്രാഥമിക ആവശ്യങ്ങൾക്കായി നിലവിൽ ജില്ലാ ആശുപത്രിയെയാണ് ഇവർ ആശ്രയിക്കുന്നത്. രാത്രിയിൽ സാമൂഹിക വിരുദ്ധരുടെ ശല്യം മൂലം ഉറങ്ങാതെ കാവലിരിക്കുന്ന ഈ അവസ്ഥക്ക് എന്ന് പരിഹാരമുണ്ടാകുമെന്നറിയില്ലെന്നും താമസിക്കാൻ ഒരു മുറി മാത്രമാണ് തങ്ങളുടെ ആവശ്യമെന്നും ജിബി പറഞ്ഞു.
