മലയാളമിത്രം നാഷണല് ഡസ്ക് 
ലോക്സഭ ഇലക്ഷൻ പ്രഖ്യാപിച്ചതോടെ പ്രധാനമന്ത്രി നരേന്ദ്ര മോദി ജനങ്ങളോട് കാണിന്ന സ്നേഹവും വാഗ്ദാനങ്ങളും വ്യാജമാണെന്ന് തമിഴ്നാട് മുഖ്യമന്ത്രി എംകെ സ്റ്റാലിൻ. ധർമ്മപുരിയിലെ വേദിയിൽ സംസാരിക്കവെയാണ് സ്റ്റാലിൻ്റെ ആരോപണം. കേന്ദ്രം സംസ്ഥാനങ്ങളെ തുല്യമായി കാണുന്നില്ലെന്നും അദ്ദേഹം കൂട്ടിച്ചേർത്തു.
“ഞങ്ങൾ എല്ലാ ജില്ലകളെയും ഒരുപോലെയാണ് കാണുന്നത്. എന്നാൽ ബി.ജെ.പിയുടെ നേതൃത്വത്തിലുള്ള കേന്ദ്ര സർക്കാർ എല്ലാ സംസ്ഥാനങ്ങളെയും ഒരുപോലെയാണോ കാണുന്നത്? കേന്ദ്രസർക്കാർ എല്ലാ സംസ്ഥാനങ്ങളെയും ബഹുമാനിക്കുകയും പരി പോഷിപ്പിക്കുകയും വേണം, പകരം അവയെ നശിപ്പിക്കാനാണ് ശ്രമിക്കുന്നത്. സംസ്ഥാനങ്ങളെ തകർത്തുകൊണ്ട് അത് (കേന്ദ്രം) നമ്മുടെ ഭാഷയെയും പാരമ്പര്യ ത്തെയും വംശത്തെയും നശിപ്പിക്കാനാണ് ശ്രമിക്കുന്നതെന്നും മുഖ്യമന്ത്രി കൂട്ടിച്ചേർത്തു.
പ്രധാനമന്ത്രിയുടെ അടിക്കടിയുള്ള തമിഴ്നാട് സന്ദർശനങ്ങളെ പരിഹസിച്ച സ്റ്റാലിൻ, യാത്രകൾ ഒരു പ്രയോജനവും നൽകിയില്ലെന്നും പറഞ്ഞു. “തിരഞ്ഞെടുപ്പ് അടുത്ത തോടെ പ്രധാനമന്ത്രി ഇടയ്ക്കിടെ സംസ്ഥാനത്ത് സന്ദർശനം നടത്തുന്നു. തമിഴ്‌നാട്ടിലെ ജനങ്ങൾ സന്ദർശനങ്ങളെ വെറുതെയുള്ള യാത്രകളായി മാത്രം കാണുന്നു. ഇത്തരം യാത്രകൾ കൊണ്ട് എന്തെങ്കിലും വളർച്ചയുണ്ടോ? 2019-ൽ മധുരയിൽ എയിംസിന് തറക്കല്ലിട്ടതായി അവർ നാടകം കളിക്കുകയാണ്. തിരഞ്ഞെടുപ്പ് കഴിഞ്ഞാൽ അതും നിർത്തും,” അദ്ദേഹം പറഞ്ഞു.
“തെരഞ്ഞെടുപ്പിന് തൊട്ടുമുമ്പ് പ്രധാനമന്ത്രി എൽപിജി നിരക്ക് കുറയ്ക്കുമെന്ന് പ്രഖ്യാപിച്ചിരുന്നു . 10 വർഷമായി 500 രൂപ കൂട്ടിയിരുന്നത് ഇപ്പോൾ 100 രൂപ കുറച്ചു. ഇതൊരു തട്ടിപ്പല്ലേ? ആളുകളെ വഞ്ചിക്കാൻ ഇതിലും മോശമായ മാർഗമുണ്ടോ? കഴിഞ്ഞ വർഷം ചെന്നൈയിലും തൂത്തുക്കുടിയിലും വെള്ളപ്പൊക്കമുണ്ടായപ്പോഴും മോദി സംസ്ഥാനം സന്ദർശിച്ചില്ലെന്ന് മുഖ്യമന്ത്രി പറഞ്ഞു. ജനങ്ങളുടെ ക്ഷേമ പ്രവർത്തനങ്ങൾക്ക് അവരുടെ കൈയ്യിൽ നിന്ന് പിരിയ്ക്കുന്ന പണം പോലും നൽകുന്നില്ലെന്നും സ്റ്റാലിൻ ആക്ഷേപിച്ചു.
