ബൂഷെഹർ ആണവനിലയത്തിന് നേരെ ആക്രമണമുണ്ടായാൽ വൻ ദുരന്തം: മുന്നറിയിപ്പുമായി ഇറാന്‍

ടെഹ്‌റാൻ: ഇറാന്റെ ആണവ കേന്ദ്രമായ ബൂഷെഹർ റിയാക്ടറിന് നേരെ സൈനിക ആക്രമണ മുണ്ടായാൽ അത് അതിർത്തികൾ കടന്നുള്ള വൻ റേഡിയേഷൻ ദുരന്തത്തിന് വഴിവെക്കുമെന്ന് ടെഹ്‌റാന്റെ മുന്നറിയിപ്പ്. റിയാക്ടർ ഉരുകുന്നതിനും (Meltdown) റേഡിയേഷൻ വ്യാപകമായി ചോരുന്നതിനും സാധ്യതയുണ്ടെന്നും ഇത് മേഖലയിലെ ദശലക്ഷക്കണക്കിന് ആളുകളെ ബാധിക്കുമെന്നും അധികൃതർ വ്യക്തമാക്കി.

ആണവനിലയങ്ങളെ ലക്ഷ്യം വെച്ചുള്ള നീക്കങ്ങൾ അന്താരാഷ്ട്ര നിയമങ്ങളുടെയും ഐക്യരാഷ്ട്ര സഭയുടെ (UN) ചട്ടങ്ങളുടെയും നഗ്നമായ ലംഘനമാണെന്ന് ഇറാൻ പ്രസ്താവനയിൽ ചൂണ്ടിക്കാട്ടി. സമാധാനപരമായ ആവശ്യങ്ങൾക്കായി പ്രവർത്തിക്കുന്ന പ്ലാന്റിന് നേരെയുള്ള ഭീഷണി ആഗോള സുരക്ഷയെത്തന്നെ ബാധിക്കുമെന്നും അധികൃതർ ഓർമ്മിപ്പിച്ചു.

പ്ലാന്റ് ആക്രമിക്കപ്പെട്ടാൽ റേഡിയേഷൻ കാറ്റിലൂടെയും കടൽവെള്ളത്തിലൂടെയും അയൽരാജ്യങ്ങളി ലേക്ക് അതിവേഗം പടരാൻ സാധ്യതയുണ്ട്. പേർഷ്യൻ ഗൾഫ് മേഖലയിലെ കുടിവെള്ള സ്രോതസ്സുകൾ മലിനമാക്കപ്പെടുമെന്നും ഇത് പതിറ്റാണ്ടുകൾ നീണ്ടുനിൽക്കുന്ന പാരിസ്ഥിതിക ആഘാതമുണ്ടാക്കു മെന്നും ശാസ്ത്രലോകം ഭയപ്പെടുന്നു.

ആണവ സുരക്ഷാ മാനദണ്ഡങ്ങൾ ലംഘിക്കുന്ന തരത്തിലുള്ള നീക്കങ്ങളിൽ നിന്ന് സൈനിക ശക്തികൾ പിന്മാറണമെന്ന് അന്താരാഷ്ട്ര ആണവോർജ്ജ ഏജൻസിയും (IAEA) നേരത്തെ ആവശ്യപ്പെട്ടിരുന്നു.