മലയാളമിത്രം നാഷണല് ഡസ്ക് 
കേന്ദ്ര” സംസ്ഥാന സർക്കാരുകളുടെ സമയോചിതമായ ഇടപെടൽ മൂലം സംഘർഷ ഭരിതമായ മണിപ്പൂരിൽ(Manipur) പ്രകടമായ പുരോഗതി ഉണ്ടായതായി പ്രധാനമന്ത്രി നരേന്ദ്ര മോദി വിഷയത്തിൽ മുമ്പ് സംസാരിച്ചിട്ടുണ്ടെന്നും മികച്ച ഇടപെടലുകൾ മണിപ്പൂരിൽ നടത്തിയെന്നുമാണ് മോദി പറഞ്ഞത്. സംസ്ഥാനത്തെ വംശീയ കലാ പത്തെ ചൊല്ലി പ്രതിപക്ഷം രൂക്ഷമായ വിമർശനം ഉയർത്തിയ പശ്ചാത്തലത്തിൽ കൂടിയാണ് പ്രധാനമന്ത്രിയുടെ പ്രതികരണം.
“ഇതിനെക്കുറിച്ച് ഞാൻ ഇതിനകം പാർലമെൻ്റിൽ സംസാരിച്ചിട്ടുണ്ട്. സംഘർഷം പരിഹരിക്കുന്നതിനായി ഞങ്ങൾ ഞങ്ങളുടെ മികച്ച ഭരണസംവിധാനം പ്രയോഗിച്ചു. ഇന്ത്യാ ഗവൺമെൻ്റിൻ്റെ സമയോചിതമായ ഇടപെടലും മണിപ്പൂർ ഗവൺമെൻ്റിൻ്റെ ശ്രമങ്ങളും കാരണം സംസ്ഥാനത്തിൻ്റെ അവസ്ഥയിൽ പ്രകടമായ പുരോഗതി ഉണ്ടായിട്ടുണ്ട് ,” അസം ട്രിബ്യൂൺ പത്രത്തോട് പ്രധാനമന്ത്രി പറഞ്ഞു.
സംഘർഷം അതിൻ്റെ മൂർദ്ധന്യത്തിൽ ആയിരിക്കുമ്പോൾ ആഭ്യന്തര മന്ത്രി അമിത് ഷാ മണിപ്പൂരിൽ തങ്ങുകയും സംഘർഷം പരിഹരിക്കാൻ സഹായിക്കുന്നതിനായി വിവിധ തല്പരകക്ഷികളുമായി 15-ലധികം മീറ്റിംഗുകൾ നടത്തുകയും ചെയ്തുവെന്നും പ്രധാനമന്ത്രി പറഞ്ഞു.
“സംസ്ഥാന സർക്കാരിൻ്റെ ആവശ്യാനുസരണം കേന്ദ്രസർക്കാർ തുടർച്ചയായി പിന്തുണ നൽകുന്നുണ്ട്. ദുരിതാശ്വാസ പുനരധിവാസ പ്രക്രിയകൾ നടന്നുകൊണ്ടിരിക്കുകയാണ്. സംസ്ഥാനത്തെ അഭയകേന്ദ്രങ്ങളിൽ കഴിയുന്നവരുടെ ദുരിതാശ്വാസത്തിനും പുനരധി വാസത്തിനുമുള്ള സാമ്പത്തിക പാക്കേജ് ഉൾപ്പെടെയുള്ള പരിഹാര നടപടികളിൽ ഉൾപ്പെടുന്നു.” പ്രധാനമന്ത്രി മോദി പറഞ്ഞു.
കഴിഞ്ഞ വർഷം മേയിൽ വംശീയ കലാപം പൊട്ടിപ്പുറപ്പെട്ടതുമുതൽ സംസ്ഥാനത്തെ സംഘർഷഭരിതമായ സ്ഥിതിഗതികൾ ചൂണ്ടിക്കാട്ടി മോദി സർക്കാരിനെ പ്രതിപക്ഷം കുറ്റപ്പെടുത്തുന്നുണ്ട്. മണിപ്പൂർ വിഷയത്തിൽ പ്രതിപക്ഷം നിരവധി തവണ പ്രധാന മന്ത്രിയെ കടന്നാക്രമിച്ചു. മണിപ്പൂരിലെ സ്ഥിതിഗതികളെക്കുറിച്ച് പ്രധാനമന്ത്രിയുടെ പ്രസ്താവന ആവശ്യപ്പെട്ട് കഴിഞ്ഞ വർഷം ബിജെപി സർക്കാരിനെതിരെ പ്രതിപക്ഷം അവിശ്വാസ പ്രമേയവും കൊണ്ടുവന്നിരുന്നു.
ഒടുവിൽ പാർലമെൻ്റിൽ മണിപ്പൂരിനെക്കുറിച്ച് പ്രധാനമന്ത്രി പ്രതികരിച്ചു. രാജ്യം മുഴുവൻ മണിപ്പൂരിനൊപ്പം ഉണ്ട്. സംസ്ഥാനത്ത് സമാധാനം പുനഃസ്ഥാപിക്കാൻ കേന്ദ്ര-സംസ്ഥാന സർക്കാരുകൾ ഒരുമിച്ച് പ്രവർത്തിക്കുന്നുവെന്നായിരുന്നു പ്രതികരണം.
കഴിഞ്ഞ വർഷം മെയ് 3 ന് മണിപ്പൂരിൽ ആരംഭിച്ച രണ്ട് ഗോത്ര വിഭാഗങ്ങളായ കുക്കികളും മെയ്തേയികളും തമ്മിലുണ്ടായ വംശീയ ഏറ്റുമുട്ടലിൽ 200 ഓളം പേർ കൊല്ലപ്പെട്ടു. പട്ടികവർഗ (എസ്ടി) പദവിക്ക് വേണ്ടിയുള്ള മെയ്തേയ് സമുദായത്തിൻ്റെ ആവശ്യത്തിൽ പ്രതിഷേധിച്ച് മലയോര ജില്ലകളിൽ ‘ആദിവാസി ഐക്യദാർഢ്യ മാർച്ച്’ സംഘടിപ്പിച്ചതിന് ശേഷമാണ് അക്രമം പൊട്ടിപ്പുറപ്പെട്ടത്.
അടുത്തിടെ സംസ്ഥാന രൂപീകരണ ദിനത്തില്‍ മണിപ്പൂര്‍ ഉള്‍പ്പെടെയുള്ള വടക്കു കിഴക്കന്‍ സംസ്ഥാനങ്ങള്‍ക്ക് പ്രധാനമന്ത്രി ആശംസ നേർന്നിരുന്നു. വടക്കുകിഴക്കന്‍ സംസ്ഥാനങ്ങളുടെ സംസ്‌കാരം, സമ്പന്നമായ ചരിത്രം, പാരമ്പര്യങ്ങള്‍, നേട്ടങ്ങള്‍ എന്നിവയെ പ്രശംസിച്ചുകൊണ്ടാണ് മോദിയുടെ ട്വീറ്റുകള്‍. മണിപ്പൂര്‍, മേഘാലയ, ത്രിപുര എന്നീ സംസ്ഥാനങ്ങളാണ് 52-മത് സംസ്ഥാന രൂപീകരണ ദിനം ആഘോഷിക്കുന്നത്.
‘മണിപ്പൂരിന്റെ സംസ്ഥാന രൂപീകരണ ദിനത്തില്‍, സംസ്ഥാനത്തെ ജനങ്ങള്‍ക്ക് എന്റെ ആശംസകള്‍. മണിപ്പൂര്‍ ഇന്ത്യയുടെ പുരോഗതിക്ക് ശക്തമായ സംഭാവന നല്‍കി. സംസ്ഥാനത്തിന്റെ സംസ്‌കാരത്തിലും പാരമ്പര്യത്തിലും ഞങ്ങള്‍ അഭിമാനിക്കുന്നു. മണിപ്പൂരിന്റെ തുടര്‍ച്ചയായ വികസനത്തിനായി ഞാന്‍ പ്രാര്‍ത്ഥിക്കുന്നു,’ പ്രധാനമന്ത്രി മോദി ട്വീറ്റ് ചെയ്തു.
