അഭിമാനത്തിന്റെ മൂന്ന് നൂറ്റാണ്ടുകൾ; പതറാത്ത പതാകയുമായി സൗദി അറേബ്യ മുന്നോട്ട്: കിരീടാവകാശിയുടെ വാക്കുകൾ ആവേശമാകുന്നു

റിയാദ്: സൗദി അറേബ്യയുടെ ചരിത്രപരമായ ആഴത്തെയും മൂന്ന് നൂറ്റാണ്ടുകൾ പിന്നിട്ട മഹത്തായ പാരമ്പര്യത്തെയും അനുസ്മരിച്ചുകൊണ്ട് കിരീടാവകാശി മുഹമ്മദ് ബിൻ സൽമാൻ രാജകുമാരൻ നടത്തിയ പ്രസ്താവനകൾ പ്രവാസി സമൂഹമുൾപ്പെടെയുള്ളവർക്കിടയിൽ വലിയ ചർച്ചയാകുന്നു. രാജ്യത്തിന്റെ അന്തസ്സും ഒരിക്കലും താഴാത്ത ദേശീയ പതാകയുടെ മഹിമയുമാണ് അദ്ദേഹത്തിന്റെ വാക്കുകളിൽ പ്രതിഫലിക്കുന്നത്.

1727-ൽ ഇമാം മുഹമ്മദ് ബിൻ സൗദ് ഒന്നാം സൗദി രാഷ്ട്രത്തിന് അടിത്തറയിട്ടത് മുതലുള്ള മൂന്ന് നൂറ്റാണ്ടു കളുടെ പോരാട്ടത്തിന്റെയും അതിജീവനത്തിന്റെയും കഥയാണ് കിരീടാവകാശി ഓർമ്മിപ്പിച്ചത്. കേവലം ഒരു ആധുനിക രാഷ്ട്രം എന്നതിലുപരി, ശക്തമായ വേരുകളുള്ള ഒരു സംസ്‌കാരത്തിന്റെ ഉടമകളാണ് തങ്ങളെന്ന് അദ്ദേഹം ഊന്നിപ്പറഞ്ഞു.

ലോകത്തെ മറ്റ് പതാകകളിൽ നിന്ന് വ്യത്യസ്തമായി, ദുഃഖാചരണ വേളകളിൽ പോലും പകുതി താഴ്ത്തിക്കെട്ടാത്ത സൗദി അറേബ്യയുടെ പതാകയുടെ പവിത്രതയെക്കുറിച്ച് അദ്ദേഹം പരാമർശിച്ചു. പതാകയിലെ ‘ശഹാദത്ത്’ കലിമയുടെ മഹത്വവും രാജ്യത്തിന്റെ കുലുങ്ങാത്ത പരമാധികാരവുമാണ് ഇതിലൂടെ ഉയർത്തിക്കാട്ടുന്നത്.

പൂർവ്വികർ പകർന്നുനൽകിയ ഈ മഹത്തായ പൈതൃകത്തെ മുറുകെ പിടിച്ചുകൊണ്ട് തന്നെ, ‘വിഷൻ 2030’ ലൂടെ രാജ്യത്തെ ലോകത്തിന്റെ നെറുകയിലേക്ക് എത്തിക്കാനുള്ള ദീർഘവീക്ഷണമാണ് ഈ പ്രസ്താവനകളിൽ പ്രകടമാകുന്നത്. ഓരോ സൗദി പൗരനും പ്രവാസിക്കും ഒരുപോലെ ആവേശം പകരുന്നതാണ് ഈ വാക്കുകൾ.