എട്ട് മീറ്ററോളം നീളം,​ വളർന്നുകൊണ്ടിരിക്കുന്ന പെരുമ്പാമ്പ്; പെണ്ണ് വർഗത്തിനുണ്ട് വലിയ പ്രത്യേകതകൾ

ലോകത്തിലെ ഏറ്റവും നീളം കൂടിയ കാട്ടുപാമ്പായി ഗിന്നസ് ലോക റെക്കാഡ് നേടി ഇന്തോനേഷ്യയിലെ ദക്ഷിണ സുലവേസിയിൽ കണ്ടെത്തിയ പെരുമ്പാമ്പ്. ഇബു ബാരൺ എന്ന് പേര് നൽകിയിരിക്കുന്ന പെരുമ്പാമ്പിന് 7.22 മീറ്റർ (23 അടി, എട്ട് ഇഞ്ച്) ആണ് നീളം. 2026 ജനുവരി 18നാണ് അവസാനമായി അളവെടുത്തത്.

നൂറ് കിലോഗ്രാമിലേറെയാണ് ഇതിന്റെ ഭാരം. മലായോപൈത്തൺ റെറ്റികുലാറ്റസ് എന്ന ഇനത്തിൽപ്പെട്ട പാമ്പാണിത്. ഈ ഇനത്തിൽപ്പെട്ട പെൺപാമ്പുകളാണ് സാധാരണയായി ആൺ വർഗത്തേക്കാൾ കൂടുതൽ വളരുന്നത്. പ്രാദേശിക പാമ്പ് സംരക്ഷകനായ ബുദി പർവാന്റോയാണ് നിലവിൽ ഇബു ബാരണെ സംരക്ഷിക്കുന്നത്. പാമ്പ് സംരക്ഷണകേന്ദ്രത്തിൽ പ്രത്യേകമായി തയ്യാറാക്കിയ കൂട്ടിലാണ് ഇതിനെ പാർപ്പിച്ചിരിക്കുന്നത്.

സർവേ ടേപ്പ് ഉപയോഗിച്ചാണ് ഇബു ബാരണിന് 7.22 മീറ്റർ നീളം അളന്നത്. മാത്രമല്ല പാമ്പ് ഉണർന്നിരുന്ന സമയമായിരുന്നു. ഉണർന്നിരിക്കുമ്പോൾ പാമ്പിന്റെ ശരീരത്തിൽ സ്വാഭാവിക വളവുകൾ ഉണ്ടാവും. അനസ്തേഷ്യ നൽകിയാൽ പാമ്പിന്റെ പേശികൾ പൂർണമായും വിശ്രമിക്കുകയും നീളം കൂട്ടുകയും ചെയ്യും. അത്തരം സാഹചര്യങ്ങളിൽ ഇബു ബാരണിന് കുറഞ്ഞത് 10 ശതമാനം കൂടുതൽ നീളം ഉണ്ടാകുമെന്ന് ഗിന്നസ് വേൾഡ് റെക്കോർഡ്സ് രേഖപ്പെടുത്തുന്നു. അപ്പോൾ ഏകദേശം 7.9 മീറ്റർ നീളമായിരിക്കാം ഇബു ബാരണിനുണ്ടാവുക. എന്നാൽ സുരക്ഷാ കാരണങ്ങളാലോ ആവശ്യമായ മെഡിക്കൽ നടപടിക്രമങ്ങൾക്കോ ​​മാത്രമേ മൃഗങ്ങൾക്ക് അനസ്തേഷ്യ നൽകാൻ പാടുള്ളൂ. അളവെടുപ്പ് സ്ഥിരീകരണത്തിനല്ല എന്ന് പറയുന്നു.