ഹോർമുസ് കടലിടുക്കിലേക്ക് കപ്പലുകള്‍ അയക്കില്ല; ട്രംപിന്റെ ആവശ്യം തള്ളി യൂറോപ്പ്

ബെർലിൻ: ഹോർമുസ് കടലിടുക്കിൽ സുരക്ഷാ ദൗത്യത്തിനായി യുദ്ധക്കപ്പലുകൾ അയക്കണമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ആവശ്യം യൂറോപ്യൻ രാജ്യങ്ങൾ നിരസിച്ചു. ഇറാനുമായുള്ള തർക്കം തങ്ങളുടെ യുദ്ധമല്ലെന്നും സമാധാനപരമായ ചർച്ചകളാണ് നിലവിൽ ആവശ്യമെന്നും പ്രമുഖ യൂറോപ്യൻ രാജ്യങ്ങൾ വ്യക്തമാക്കി.

അമേരിക്കയുടെ സൈനിക നീക്കത്തിൽ പങ്കുചേരില്ലെന്ന് ജർമ്മനി ഔദ്യോഗികമായി അറിയിച്ചു. ഇറാനുമായുള്ള നിലവിലെ പ്രശ്നങ്ങൾ നാറ്റോയുടെ (NATO) പരിധിയിൽ വരുന്നതല്ലെന്നും ബെർലിൻ ചൂണ്ടിക്കാട്ടി. മേഖലയിൽ സൈനിക വിന്യാസം നടത്തുന്നത് സ്ഥിതിഗതികൾ കൂടുതൽ വഷളാക്കുമെന്നാണ് ജർമ്മനിയുടെ വിലയിരുത്തൽ.

വിഷയത്തിൽ സഹായം നൽകുന്നതിനെക്കുറിച്ച് ബ്രിട്ടനും ഡെൻമാർക്കും ആലോചിക്കുന്നുണ്ടെങ്കിലും അതീവ ജാഗ്രതയോടെയുള്ള സമീപനമാണ് അവർ സ്വീകരിക്കുന്നത്. ഇറാനുമായുള്ള സംഘർഷം ലഘൂകരിക്കാനാണ് മുൻഗണന നൽകേണ്ടതെന്ന് ഇരുരാജ്യങ്ങളും ആവശ്യപ്പെട്ടു. അമേരിക്കയുടെ നേതൃത്വത്തിലുള്ള നേരിട്ടുള്ള സൈനിക ഇടപെടലിനേക്കാൾ, യൂറോപ്യൻ രാജ്യങ്ങളുടെ കൂട്ടായ നയതന്ത്ര നീക്കത്തിനാണ് ഇവർ പ്രാധാന്യം നൽകുന്നത്.

ലോകത്തിലെ ഇന്ധന ഗതാഗതത്തിന്റെ സിരാകേന്ദ്രമായ ഹോർമുസ് കടലിടുക്കിൽ ഇറാൻ കപ്പലുകൾ തടയുന്നു എന്നാരോപിച്ചാണ് അമേരിക്ക സഖ്യകക്ഷികളുടെ സഹായം തേടിയത്. എന്നാൽ ഇറാനു മായുള്ള ആണവ കരാറിൽ നിന്ന് അമേരിക്ക ഏകപക്ഷീയമായി പിന്മാറിയതാണ് പ്രശ്നങ്ങൾക്ക് കാരണമെന്ന നിലപാടിലാണ് ഭൂരിഭാഗം യൂറോപ്യൻ രാജ്യങ്ങളും.