അന്താരാഷ്ട്ര ഡെസ്ക് 
റാബത്ത്: ആഫ്രിക്കൻ രാജ്യമായ മൊറോക്കോയിൽ റിപ്പോർട്ട് ചെയ്ത ശക്തമായ ഭൂകമ്പത്തിൽ മരണസംഖ്യ രണ്ടായിരം കവിഞ്ഞു. നിരവധിയാളുകൾക്ക് ഗുരുതര പരിക്ക് പറ്റിയിട്ടുണ്ടെന്നും വൻ നാശനഷ്ടമാണ് രാജ്യത്തുണ്ടായിരിക്കുന്നതെമന്നും അധികൃതർ ശനിയാഴ്ച വ്യക്തമാക്കി.
വെള്ളിയാഴ്ച പ്രാദേശിക സമയം അർദ്ധരാത്രി 11.11 മണിക്ക് പൗരാണിക നഗരമായ മരക്കേഷിൽ നിന്നും 72 കിലോമീറ്റർ അകലെ ഹൈ അറ്റ്ലസ് പർവതമേഖലയാണ് ഭൂചലനത്തിന്റെ പ്രഭവകേന്ദ്രം. രാജ്യത്ത് ആറ് പതിറ്റാണ്ടിനിടെ റിപ്പോർട്ട് ചെയ്ത ശക്തമായ ഭൂകമ്പമാണിത്.
നിലവിൽ 2012 പേരുടെ മരണം അധികൃതർ സ്ഥിരീകരിച്ചിട്ടുണ്ട്. 2059 പേർക്ക് പരിക്കേറ്റിട്ടുണ്ട്, ഇതിൽ 1,404 പേരുടെ നില അതീവഗുരുതരമാണെന്നും മന്ത്രാലയം പുറത്തിറക്കിയ വാർത്താക്കുറിപ്പിൽ പറയുന്നു. നിരവധി കെട്ടിടങ്ങൾ തകർന്നിട്ടുണ്ട്, ഇതിന്റെ അവശിഷ്ടങ്ങൾക്കിടയിൽ ഇപ്പോഴും നിരവധിയാളുകൾ കുടുങ്ങിക്കിടക്കുന്ന തായാണ് റിപ്പോർട്ട്. ഭൂകമ്പം അർദ്ധരാത്രിയിൽ ആയതിനാൽ തന്നെ മരണസംഘ്യ ഇനിയും വർദ്ധിക്കുമെന്നും റിപ്പോർട്ടുണ്ട്.
തീരദേശ നഗരങ്ങളായ റബാത്ത്, കാസബ്ലാങ്ക, എസ്സൗറ എന്നിവിടങ്ങളിലും ശക്തമായ ഭൂചലനം അനുഭവപ്പെട്ടു. ദുരന്തത്തിന്റെ പശ്ചാത്തലത്തിൽ വിദേശ രാജ്യങ്ങളിൽ നിന്ന് അടക്കം നിരവധിയാളുകൾ സഹായഹസ്തവുമായി രംഗത്തുവന്നിട്ടുണ്ട്. ഇക്കൂട്ട ത്തിൽ വർഷങ്ങളായി ശത്രുത പുലർത്തിയിരുന്ന അൾജീരയ അടക്കമുണ്ടെന്നത് ശ്രദ്ധേയമായ കാര്യമാണ്.
അയൽരാജ്യമായ അൾജീരിയയിലും ഭൂചലനം അനുഭവപ്പെട്ടു. ഇവിടെ നാശനഷ്ടങ്ങളോ ആളപായമോ ഉണ്ടായിട്ടില്ലെന്ന് അൾജീരിയൻ സിവിൽ ഡിഫൻസ് അറിയിച്ചു. 1960ൽ മൊറോക്കൻ നഗരമായ അഗദിറിൽ ഉണ്ടായ വൻഭൂകമ്പത്തിൽ 12,000 പേരിലധികം ആളുകൾ കൊല്ലപ്പെട്ടിരുന്നു. വടക്കുകിഴക്കൻ മൊറോക്കൻ നഗരമായ അൽ ഹൊകൈ മയിൽ 2004ൽ ഉണ്ടായ ഭൂകമ്പത്തിൽ 628 പേർ കൊല്ലപ്പെട്ടിരുന്നു.
ദുരന്തത്തിൽ പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷീ ജിൻപിങ്ങും അടക്കമുള്ള ലോകനേതാക്കൾ അനുശോചനം രേഖപ്പെടുത്തി രംഗത്തുവന്നിട്ടുണ്ട്.
