മലയാളമിത്രം നാഷണല് ഡസ്ക് 
കനത്ത മഴ തുടരുന്ന സാഹചര്യത്തിൽ ഡൽഹി വിമാനത്താവളത്തിൻ്റെ ടെർമിനൽ 1-ലെ മേൽക്കൂരയുടെ ഒരു ഭാഗം തകർന്ന് ഒരാൾ മരിച്ചു. മറ്റ് നാലുപേരെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവത്തെ തുടർന്ന് ടെർമിനൽ 1 ലെ എല്ലാ പ്രവർത്തനങ്ങളും ഇനിയൊരു അറിയിപ്പ് ഉണ്ടാകുന്നതുവരെ താൽക്കാലികമായി നിർത്തിവച്ചതായി സിവിൽ ഏവിയേഷൻ മന്ത്രാലയം അറിയിച്ചു. വിമാനങ്ങളുടെ സുഗമമായ പ്രവർത്തനം ഉറപ്പാക്കാൻ ഇതര ക്രമീകരണങ്ങൾ ഏർപ്പെടുത്തിയിട്ടുണ്ടെന്നും അധികൃതർ കൂട്ടിച്ചേർത്തു.
ഇതര ഫ്ലൈറ്റുകളിൽ യാത്രക്കാരെ ഉൾക്കൊള്ളാനോ അല്ലെങ്കിൽ നിയന്ത്രണങ്ങൾ പ്രകാരം മുഴുവൻ റീഫണ്ടുകൾ നൽകാനോ എയർലൈനുകൾക്ക് നിർദ്ദേശം നൽകിയിട്ടുണ്ടെന്ന് ഡയറക്ടർ ജനറൽ ഓഫ് സിവിൽ ഏവിയേഷൻ (ഡിജിസിഎ) അറിയിച്ചു. അർദ്ധരാത്രി മുതൽ 16 പുറപ്പെടൽ വിമാനങ്ങളും 12 എത്തിച്ചേരൽ വിമാനങ്ങളും റദ്ദാക്കിയതായി അധികൃതർ അറിയിച്ചു.
അതേസമയം, സ്ഥിതിഗതികൾ വിലയിരുത്താൻ വ്യോമയാന മന്ത്രി രാം മോഹൻ നായിഡു വിമാനത്താവളത്തിലെത്തി. സ്ഥിതിഗതികൾ നിയന്ത്രണവിധേയമാണെന്നും സമഗ്രമായ പരിശോധന നടക്കുന്നുണ്ടെന്നും അവലോകനത്തിന് ശേഷം മന്ത്രി നായിഡു പറഞ്ഞു. അപകടസാധ്യത വിലയിരുത്താൻ രാജ്യവ്യാപകമായി ഓഡിറ്റ് നടത്തുമെന്ന് അദ്ദേഹം അറിയിച്ചു.
പുലർച്ചെ 5.30ഓടെയാണ് മേൽക്കൂര തകർന്നതായി ഫോൺ വിളിച്ചതെന്ന് അഗ്നിശ മനസേന അറിയിച്ചു. അടിയന്തര രക്ഷാപ്രവർത്തനത്തിനായി കുറഞ്ഞത് നാല് ഫയർ ടെൻഡറുകളെങ്കിലും സംഭവസ്ഥലത്തെത്തിയിരുന്നതായും അധികൃതർ വ്യക്തമാക്കി. അതിനിടെ, ദേശീയ തലസ്ഥാന മേഖലയിൽ മഴ പെയ്തതിനെ തുടർന്ന് ഡൽഹിയിലെ യും സമീപ പ്രദേശങ്ങളിലെയും നിരവധി പ്രദേശങ്ങളിൽ കനത്ത വെള്ളക്കെട്ടിലായി. പല റോഡുകളിലും വാഹനങ്ങൾ പകുതിയോളം വെള്ളത്തിൽ മുങ്ങിയിരിക്കുകയാണ്. പുലർച്ചെയുള്ള യാത്രയും ഏറെ അപകരമായിരുന്നു. കഴിഞ്ഞ കുറച്ച് ദിവസങ്ങളി ലായി തലസ്ഥാനത്ത് മഴ തുടരുകയാണ്. കനത്ത ചൂടിന് മഴ ആശ്വാസമാകുമെങ്കിലും ലഭിക്കുന്ന മഴയുടെ അളവ് വർദ്ധിച്ചാൽ പലയിടത്തും വെള്ളക്കെട്ട് രൂപപ്പെടും.
