ക്രിമിനല്‍ കുറ്റാരോപണങ്ങള്‍ പരിശോധിക്കാന്‍ സമിതിക്ക്‌ അധികാരമില്ല, ചെയര്‍മാന്‌ കത്തയച്ച് മഹുവ
മലയാളമിത്രം വെബ് ഡസ്ക് 
മണ്ണപ്പം ചുട്ടുവിളമ്പിയ-
തുണ്ണണമെന്നു ശഠിയ്ക്കുമ്പോൾ,
മരമണ്ടനെ മണ്ടയ്ക്കിട്ടു-
കിഴുക്കാനൊന്നു മടിച്ചെന്നാൽ,
മതമിങ്ങനെ മതിയിലെ-
യർബുദമായി പടർന്നതുപോൽ,
മണ്ണുണ്ടും മണ്ണിലുരുണ്ടും-
മണ്ണുണ്ണികളാവാം..
കണ്ടില്ലേ, കഥകളിൽനിന്നും-
കനലു പിറക്കണു, കലകളൊടുങ്ങണു-
കാർന്നോന്മാർ നട്ടതിലൊക്കെ-
പേട് ഫലങ്ങൾ കായ്ച്ചുതുടങ്ങി.
ആരാണ്ടേതാണ്ടൊരു കാല-
ത്തെങ്ങാണ്ടെഴുതിയ ഭാവനകൾ,
നിനവുകടഞ്ഞുരുട്ടി, നഞ്ചും-
കലർത്തിയിന്നു വിളമ്പുന്നു.
വിഷമയമായോരോ, മനുജ-
വിചാരവുമരുതാത്തതിരുകളായ്,
പകനിറയണ മനസ്സുകൾ പുകയണു-
തമ്മിലുടക്കും ബന്ധങ്ങൾ..
അതിരുകളുടെ ചിന്തകളില്ലാ-
ത്തനുഭവമല്ലേ സൗഹാർദം,
അരുതായ്മകൾ കൂട്ടിക്കെട്ടിയ-
കാട്ടിക്കൂട്ടലിനെന്തർത്ഥം.
ഒന്നായതറുത്തു മുറിച്ചതിലെരിവും-
ചേർത്തിട്ടേച്ചു കൊരുത്തവർ,
ഒരിയ്ക്കലും കൂടാ മുറിവുക-
ളഴുകിയതൂറ്റിത്തഴച്ചിടുന്നു.
സൗഹാർദം, മതസൗഹാർദം-
ഏച്ചുമുറുക്കിയ പാശം പോൽ,
ചിന്തകളെയുടക്കിയിടാനായ്-
ആരുപടച്ച കുതന്ത്രങ്ങൾ?
മതമെന്നൊരു മറയില്ലാതെ,
വിദ്വേഷക്കറ പുരളാതെ,
ഉറ്റവരൊറ്റുയിരായ്ക്കാണണ-
കനവിനുമെന്തഴകാണെന്നോ!
