കിലോയ്ക്ക് 600 രൂപ, എളുപ്പത്തിൽ വീട്ടിൽ വളർത്തി ലാഭം കൊയ്യാം, ശ്രദ്ധിക്കേണ്ടത് ഇത്രമാത്രം!

മലയാളികൾക്കിടയിൽ മരമുന്തിരിയെന്ന് അറിയപ്പെടുന്ന ജബോട്ടിക്കാബ അഥവാ ബ്രസീലിയൻ ഗ്രേപ് ട്രീയ്ക്ക് വിപണിയിൽ ലഭിക്കുന്നത് 600 രൂപയോളമാണ്. അനുകൂല സാഹചര്യങ്ങളിൽ വർഷം മുഴുവൻ ഫലം കിട്ടുന്ന കൃഷിയാണ് മരമുന്തിരിയുടേത്. ബ്രസീലിൽ നിന്നുള്ള പഴമാണെങ്കിലും ഒട്ടുമിക്ക രാജ്യങ്ങളിലും ഇത് കൃഷി ചെയ്യുന്നുണ്ട്. ഈ മുന്തിരി വള്ളികളിലല്ല പകരം മരത്തിന്റെ തടിയിലും ശാഖകളിലുമാണ് വളരുന്നത്. പ്ലീനിയ കോളിഫ്ലോറ എന്നാണ് ജബോട്ടിക്കാബ മരത്തിന്റെ ശാസ്ത്രീയ നാമം.

ഈർപ്പമേറിയ നേരിയ അമ്ലതയുള്ള മണ്ണാണ് ഇവയ്ക്ക് ആവശ്യമായുള്ളത്. വിത്തുകൾ പഴത്തിൽ നിന്നു പുറത്തെടുത്താൽ ഏതാനും ദിവസങ്ങൾക്കകം പാകുകയും ചെയ്യണം. കൂടാതെ ചൂടുള്ള താപനിലയും മിതമായ ഈർപ്പവുമുള്ള ഉഷ്ണമേഖലാ കാലാവസ്ഥകളിലാണ് ജബോട്ടികാബ മരങ്ങൾക്ക് അനുയോജ്യം. ധാരാളം സൂര്യപ്രകാശമുള്ള സ്ഥലത്ത് നടാൻ പ്രത്യേകം ശ്രദ്ധിക്കുകയും വേണം. കൂടാതെ പതിവായി നനയ്ക്കുകയും വേണം. സാവധാനത്തിൽ വളരുകയും ഫലം കായ്ക്കാൻ ഒട്ടേറെ വർഷങ്ങൾ എടുക്കുകയും ചെയ്യുന്ന മരമാണിത്. ചില ഇനങ്ങൾ നടീൽ മുതൽ ഫലം കായ്ക്കുന്നതുവരെയുള്ള സമയം ആറുമുതൽ എട്ടുവർഷംവരെയാണ്.

അതുപോലെ ജബോട്ടിക്കാബ മരം വിത്തിൽ നിന്നോ ഗ്രാഫ്റ്റിംഗ് വഴിയോ വളർത്തിയെടുക്കാൻ കഴിയും.കുറഞ്ഞത് 15 അടി അകലത്തിൽ ആകണം മരങ്ങൾ നടുകയെന്നതാണ് ശ്രദ്ധിക്കേണ്ട മറ്റൊരു കാര്യം. ഇതിന് വർഷം മുഴുവനും പൂക്കാനും ഫലം നൽകാനും കഴിയുമെന്ന സവിശേഷത കൂടുതൽ വരുമാനം ഉണ്ടാക്കാൻ സഹായിക്കുന്ന ഘടകമാണ്. കൂടാതെ ഇവ സ്വയം പരാഗണം നടത്തുന്നവയുമാണ്. എന്നാൽ മറ്റ് മരങ്ങളിൽ നിന്നുള്ള ക്രോസ്-പരാഗണം ചിലപ്പോൾ ഉയർന്ന വിളവും വലിയ പഴങ്ങളും ഉണ്ടാക്കുകയും ചെയ്യും.