പുതുവർഷത്തെ വരവേൽക്കാനൊരുങ്ങി ഷാർജ; സുരക്ഷാ മുന്നൊരുക്കങ്ങൾ പൂർത്തിയാക്കിയതായി പൊലീസ്

ഷാർജ: പുതുവർഷത്തെ വരവേൽക്കാൻ എമിറേറ്റ് പൂർണസജ്ജമാണെന്ന് ഷാർജ പോലീസ് ജനറൽ കമാൻഡ്. പൊതുജനങ്ങളുടെ സുരക്ഷയ്ക്കായി സമഗ്ര ഗതാഗത സുരക്ഷാപദ്ധതി തയ്യാറാക്കിയിട്ടുണ്ട്. പ്രധാന ആഘോഷവേദികളും കരിമരുന്ന് പ്രയോഗങ്ങൾ സംഘടിപ്പിക്കുന്ന പ്രദേശങ്ങളും കേന്ദ്രീകരിച്ച് പട്രോളിങ് ശക്തമാക്കുമെന്ന് ഓപ്പറേഷൻസ് ആൻഡ് സെക്യൂരിറ്റി സപ്പോർട്ട് ഡയറക്ടർ – ജനറൽ ബ്രിഗേഡിയർ ജനറൽ ഡോ. അഹമ്മദ് സഈദ് അൽ നൗർ പറഞ്ഞു.

24 മണിക്കൂറും നിരീക്ഷണം നടത്തുന്നതിന് ഏറ്റവും പുതിയ സാങ്കേതിക സൗകര്യങ്ങൾ ഉപയോഗിക്കുമെന്നും അദേഹം പറഞ്ഞു. ഷാർജ മുനിസിപ്പാലിറ്റി, ഷാർജ ഇലക്‌ട്രിസിറ്റി-വാട്ടർ ആൻഡ് ഗ്യാസ് അതോറിറ്റി (എസ്.ഇ.ഡബ്ലിയു.ജി.എ), ഷാർജ റോഡ്‌സ് ആൻഡ് ട്രാൻസ്‌പൊർട്ട് അതോറിറ്റി, റാഫിദ് വെഹിക്കിൾ സൊല്യൂഷൻസ് കമ്പനി (ആർ.വി.എസ്.സി) എന്നിവയുടെ സഹകരണത്തോടെയാണ് ഈ പദ്ധതി നടപ്പാക്കുന്നത്.

അതേസമയം പുതുവത്സരത്തോട് അനുബന്ധിച്ച് ഷാർജയിൽ സർക്കാർ ജീവനക്കാർക്ക് അവധി പ്രഖ്യാപിച്ചു. എല്ലാ സർക്കാർ വകുപ്പുകൾക്കും ഏജൻസികൾക്കും സ്ഥാപനങ്ങൾക്കും ജനുവരി ഒന്നിന് അവധിയായിരിക്കും. ഈ മേഖലയിലെ ജീവനക്കാർക്ക് 2025ലെ ആദ്യത്തെ അവധിയായിരിക്കും ജനുവരി ഒന്ന്. ജനുവരി രണ്ടാം തീയതി പ്രവൃത്തി ദിനം പുനരാരംഭിക്കുമെന്നും അധികൃതർ അറിയിച്ചു.

ജനുവരി ഒന്നിന് യുഎഇയിൽ സർക്കാർ – സ്വകാര്യ മേഖലയ്ക്ക് പൊതു അവധിയായിരിക്കും. സ്വകാര്യ മേഖലയിലെ ജീവനക്കാർക്ക് അന്നേ ദിവസം ശമ്പളത്തോട് കൂടിയുള്ള അവധിയായിരിക്കും ലഭിക്കുക. യുഎഇ മാനവ വിഭവശേഷി എമിറൈറ്റേസേഷൻ മന്ത്രാലയമാണ് അവധി പ്രഖ്യാപിച്ചിരിക്കുന്നത്.

അതേസമയം പുതുവത്സരത്തോട് അനുബന്ധിച്ച് രാജ്യത്തിൻ്റെ വിവിധ ഭാ​ഗങ്ങളിലായി വിപുലമായ ആഘോഷ പരിപാടികളാണ് നടക്കുക. വിവിധ കലാ- സാംസ്കാരിക പരിപാടികൾക്കൊപ്പം കരിമരുന്ന് പ്രയോ​ഗവും സംഘടിപ്പിക്കും. ​രാജ്യത്തെ പ്രവാസി സംഘടനകളും പുതുവത്സരത്തിൻ്റെ ഭാ​ഗമായി നിരവധി പരിപാടികൾ സംഘടിപ്പിക്കും.