ന്യൂസ് ബ്യൂറോ 
വേനല്‍ക്കാലത്ത് ദാഹവും വിശപ്പും ക്ഷീണവുമകറ്റാന്‍ തണ്ണിമത്തന്‍ കഴിക്കുന്നത് വളരെ നല്ലതാണ്. എന്നാല്‍ തണ്ണിമത്തന്‍ ആരോഗ്യത്തിന് മാത്രമല്ല ചര്‍മ്മത്തെ സംരക്ഷിക്കുന്നതിനും സഹായിക്കും. ആന്റി ഓക്സിഡന്റുകളും ധാതുക്കളും അടങ്ങിയ തണ്ണിമത്തന്‍ ചര്‍മ്മത്തിന്റെ കറുപ്പ് കുറയ്ക്കുകയും ചര്‍മ്മം കൂടുതല്‍ കൂടുതല്‍ മൃദുലമാകാനും സഹായിക്കുന്നു. മുഖത്തെ ചുളിവുകളും കറുപ്പും അകറ്റാന്‍ തണ്ണിമത്തന്‍ കൊണ്ടുള്ള ചില ഫേസ് പാക്കുകള്‍ ഇതാ.
.തണ്ണിമത്തനും വെള്ളരിക്കയും ചര്‍മ്മത്തിന് വളരെയധികം ഗുണം ചെയ്യും. ഒരു ടേബിള്‍ സ്പൂണ്‍ വെള്ളരിക്ക നീരും ഒരു ടേബിള്‍ സ്പൂണ്‍ തണ്ണിമത്തന്‍ ജ്യൂസും ചേര്‍ത്ത് മിശ്രിതമാക്കുക. ശേഷം ഈ മിശ്രിതം 15 മിനുട്ട് മുഖത്തിടുക. ഉണങ്ങി കഴിഞ്ഞാല്‍ തണുത്ത വെള്ളത്തില്‍ കഴുകി കളയുക. ആഴ്ചയില്‍ രണ്ടോ മൂന്നോ തവണ ഈ പാക്ക് ഇടാവുന്നതാണ്. ചര്‍മ്മം കൂടുതല്‍ മൃദുലമാകാനും തിളക്കം കിട്ടാനും സഹായിക്കും.
വെയിലേറ്റുള്ള കരുവാളിപ്പ് അകറ്റാന്‍ തണ്ണിമത്തനോടൊപ്പം തൈര് കൂടി ചേര്‍ത്ത് മുഖത്ത് പുരട്ടുന്നത് നല്ലതാണ്. ഇതിനായി അല്‍പ്പം തണ്ണിമത്തന്‍ ജ്യൂസിനോടൊപ്പം ഒരു ടീസ്പൂണ്‍ തൈര് ചേര്‍ക്കുക. ശേഷം ഈ മിശ്രിതം മുഖത്തും കഴുത്തിലും പുരട്ടാം. 20 മിനിറ്റിന് ശേഷം തണുത്ത വെള്ളത്തില്‍ കഴുകി കളയാം.
രണ്ട് ടീസ്പൂണ്‍ തണ്ണിമത്തന്‍ ജ്യൂസും രണ്ട് ടീസ്പൂണ്‍ തൈരും ചേര്‍ത്ത് മുഖത്തിടുക. 20 മിനുട്ട് കഴിഞ്ഞ് തണുത്ത വെള്ളത്തില്‍ കഴുകി കളയുക. സണ്‍ ടാന്‍ മാറാന്‍ ഈ പാക്ക് സഹായിക്കും. തൈരില്‍ അടങ്ങിയിരിക്കുന്ന ലാക്റ്റിക് ആസിഡാണ് സണ്‍ ടാന്‍ മാറാനും മുഖത്തിന് തിളക്കം നല്‍കാനും സഹായിക്കുന്നത്. ഇതില്‍ അടങ്ങിയിരിക്കുന്ന വിറ്റാമിന്‍ ബി 5 മങ്ങിയ ചര്‍മ്മത്തിന് തിളക്കം നല്‍കുകയും കറുത്ത പാടുകളും മുഖക്കുരുവിന്റെ പാടുകളും കുറയ്ക്കുകയും ചെയ്യുന്നു.
രണ്ട് ടേബിള്‍സ്പൂണ്‍ പാലും രണ്ട് ടേബില്‍ സ്പൂണ്‍ തണ്ണിമത്തന്‍ ജ്യൂസും ചേര്‍ത്ത് മുഖത്തിടുക. മുഖത്തെ ചുളിവുകള്‍ കുറയ്ക്കാന്‍ ഈ പാക്ക് സഹായിക്കും.
