വനിതാ ലോകകപ്പ് കാര്യവട്ടത്തേക്കില്ല; മുംബൈയിലേക്ക് മാറ്റിയതായി ഐസിസിയില്‍ നിന്നും അറിയിപ്പ് ലഭിച്ചെന്ന് കെസിഎ

തിരുവനന്തപുരം: ഇന്ത്യയില്‍ നടക്കാനിരിക്കുന്ന വനിതാ ലോകകപ്പ് മത്സരങ്ങളില്‍ നിന്നും കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തെ ഒഴിവാക്കി. കണക്‌ടിങ് ഫ്‌ളൈറ്റുകളുടെ അഭാവവും ലോജിസ്റ്റിക്‌സ് ബുദ്ധിമുട്ടുകളും ചൂണ്ടിക്കാട്ടിയാണ് കാര്യവട്ടത്ത് നിശ്ചയിച്ചിരുന്ന മത്സരം മുംബൈയിലേക്ക് മാറ്റിയ തെന്ന് കേരള ക്രിക്കറ്റ് അസോസിയേഷന്‍ പ്രസിഡൻ്റ് ജയേഷ് ജോര്‍ജ് പറഞ്ഞു.

ഇൻ്റര്‍നാഷണല്‍ ക്രിക്കറ്റ് കൗണ്‍സിലില്‍ നിന്നും ഔദ്യോഗിക അറിയിപ്പ് ലഭിച്ചുവെന്നും ജയേഷ് ജോര്‍ജ് വ്യക്തമാക്കി. അന്താരാഷ്ട്ര മാനദണ്ഡങ്ങള്‍ പ്രകാരമുള്ള സ്‌റ്റേഡിയമെന്ന നിലയ്ക്ക് ഐസിസി മുന്‍പ് കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തെയും പരിഗണിച്ചിരുന്നു. എന്നാൽ ഇന്ന് ഐസിസി പുതുക്കിയ മത്സര ക്രമം ഔദ്യോഗികമായി പുറത്തു വിടുകയായിരുന്നു.

സെപ്റ്റംബര്‍ 30 മുതല്‍ നവംബര്‍ രണ്ട് വരെ നടക്കുന്ന ഐസിസി വനിതാ ക്രിക്കറ്റ് ലോകകപ്പിൻ്റെ ഉദ്ഘാടന മത്സരം ഗുവാഹത്തിയിലെ എസിഎ സ്റ്റേഡിയത്തിലാകും അരങ്ങേറുക. 12 വര്‍ഷങ്ങള്‍ക്ക് ശേഷമാണ് വനിതാ ലോകകപ്പ് ഇന്ത്യയിലേക്കെത്തുന്നത്. ശ്രീലങ്കയിലെ കൊളമ്പോയിലുള്ള ആര്‍ പ്രേമദാസാ സ്‌റ്റേഡിയത്തിലും മത്സരങ്ങളുണ്ട്.

ഐസിസി വനിതാ ക്രിക്കറ്റ് ലോകകപ്പ് മത്സരക്രമം