മലയാളമിത്രം വെബ് ഡസ്ക് 
ദുബായ്: 2025ലെ ലോക ടെസ്റ്റ് ചാമ്പ്യൻഷിപ്പ് ഫൈനലിന്‍റെ തീയതി ഐസിസി പ്രഖ്യാപിച്ചു. അടുത്ത വർഷം ജൂൺ 11 മുതൽ 15 വരെ നടക്കുമെന്ന് ഐസിസി അറിയിച്ചു.ജൂൺ 16 റിസർവ് ദിനമായും പ്രഖ്യാപിച്ചു. ഇംഗ്ലണ്ടിലെ ലോർഡ്‌സിലാണ് ഐസിസി ടെസ്റ്റ് ചാമ്പ്യൻഷിപ്പിന്‍റെ ഫൈനൽ നടക്കുന്നത്. 2021 ൽ നടന്ന ആദ്യ ലോക ടെസ്റ്റ് ചാമ്പ്യൻഷിപ്പ് ക്രിക്കറ്റ് പരമ്പരയുടെ ഫൈനൽ സതാംപ്ടണിൽ നടന്നിരുന്നു. 2023-ലെ ടെസ്റ്റ് ചാമ്പ്യൻഷിപ്പ് ഫൈനലും ഓവലിൽ നടന്നു.
കഴിഞ്ഞ രണ്ട് ലോക ടെസ്റ്റ് ചാമ്പ്യൻഷിപ്പുകളിലും യഥാക്രമം ന്യൂസിലൻഡും ഓസ്ട്രേലിയയും ട്രോഫി ഉയർത്തി.ലോക റാങ്കിങ്ങിലെ ആദ്യ രണ്ട് ടീമുകൾ ഫൈനലിൽ കളിക്കും. നിലവിലെ റാങ്കിംഗ് പ്രകാരം ഇന്ത്യയും ഓസ്‌ട്രേലിയയുമാണ് യഥാക്രമം ഒന്നും രണ്ടും സ്ഥാനങ്ങളിലുള്ളത്. ന്യൂസിലൻഡ് മൂന്നാം സ്ഥാനത്തും ഇംഗ്ലണ്ട് നാലാം സ്ഥാനത്തുമാണ്.
ശ്രീലങ്ക അഞ്ചാം സ്ഥാനത്തും ദക്ഷിണാഫ്രിക്ക ആറാം സ്ഥാനത്തും ബംഗ്ലാദേശ് ഏഴാം സ്ഥാനത്തുമാണ്. അതേ സമയം ഐസിസി ലോക ടെസ്റ്റ് ചാമ്പ്യൻഷിപ്പ് ക്രിക്കറ്റ് പരമ്പരയിൽ ഇംഗ്ലണ്ട് ടീം 58 മത്സരങ്ങൾ കളിച്ചതിൽ 29 എണ്ണം വിജയിച്ചു. ഏറ്റവും വിജയകരമായ ടീമെന്ന റെക്കോർഡ് ഇംഗ്ലണ്ട് സ്ഥാപിച്ചു.
