മലയാളമിത്രം ഗൾഫ് ഡസ്ക് 
റിയാദ്: നിയമലംഘനങ്ങളോ കുറ്റകൃത്യങ്ങളോ കുഴപ്പങ്ങളോ ശ്രദ്ധയില്‍പെട്ടാല്‍ സംഭവത്തിന്റെ ഫോട്ടോയും വീഡിയോയും സമൂഹ മാധ്യമങ്ങളിലൂടെ പ്രചരി പ്പിക്കരുതെന്ന മുന്നറിയിപ്പ് ആവര്‍ത്തിച്ച് സൗദി ആഭ്യന്തര മന്ത്രാലയം. നിയമം ലംഘിക്കുന്നവര്‍ക്കെതിരേ ശക്തമായ നിയമനടപടി സ്വീകരിക്കുമെന്ന ആഭ്യന്തര മന്ത്രാലയ സുരക്ഷാ വക്താവ് തലാല്‍ അല്‍ഷല്‍ഹൂബ് മുന്നറിയിപ്പ് നല്‍കി.
രാജ്യത്തെ സൈബര്‍ നിയമപ്രകാരം കുറ്റകൃത്യം ചിത്രീകരിക്കുന്നതും പ്രസിദ്ധീ കരിക്കുന്നതും കുറ്റകരമാണ്. നിയമലംഘനങ്ങളോ കുഴപ്പങ്ങളോ മൊബൈല്‍ ഫോണിലും മറ്റും ചിത്രീകരിക്കുകയാണെങ്കില്‍ അത് പുറത്തുവിടാതെ ബന്ധപ്പെട്ട സുരക്ഷാ അധികാരികള്‍ക്ക് സമര്‍പ്പിക്കുകയാണ് വേണ്ടത്. നിയമം ലംഘിച്ചാല്‍ കനത്ത പിഴ ശിക്ഷ ഉള്‍പ്പെടെയുള്ള ശിക്ഷാനടപടികളാണ് സ്വീകരിക്കുക.
നിയമലംഘനം സംബന്ധിച്ച വിവരങ്ങള്‍ ആഭ്യന്തര മന്ത്രാലയത്തിന്റെ സുരക്ഷാ ഓപറേഷന്‍സ് സെന്ററായ 911 എന്ന നമ്പറില്‍ ബന്ധപ്പെട്ട് ഉദ്യോഗസ്ഥരെ അറിയിക്കാം. ചിത്രങ്ങളും വീഡിയോയും കൈമാറുകയും ചെയ്യാം. ബന്ധപ്പെട്ട വിഷയത്തില്‍ ഉള്‍പ്പെട്ടവരുടെ സ്വകാര്യത പരിഗണിക്കേണ്ടതുണ്ട്. സമൂഹമാധ്യമത്തില്‍ അനുവാദമില്ലാതെ പ്രചരിപ്പിക്കുന്നത് സ്വകാര്യത ലംഘനത്തിനൊപ്പം മാനനഷ്ടമായി കണക്കാക്കും.
വാണിജ്യസ്ഥാപനങ്ങളിലും മറ്റും സ്ഥാപിച്ചിട്ടുള്ള സുരക്ഷാ നിരീക്ഷണ ക്യാമറ (സിസിടിവി) കളുടെ റെക്കോര്‍ഡിങുകള്‍ പരസ്യപ്പെടുത്തുന്നതും ഇതേ നിയമത്തി ന്റെ പരിധിയില്‍ വരും. സുരക്ഷാ നിരീക്ഷണ ക്യാമറകള്‍ പ്രവര്‍ത്തിപ്പിക്കുന്നത് സംബന്ധിച്ച് കൃത്യമായ ചട്ടങ്ങളുണ്ട്. ഇത്തരം കൃത്യങ്ങള്‍ ചെയ്യുന്നവര്‍ സുരക്ഷാ നിരീക്ഷണ ക്യാമറ നിയമം ലംഘിക്കുന്നതിനുള്ള പിഴകള്‍ അടക്കേണ്ടി വരും. സ്വകാര്യതാ നിയമം സുരക്ഷാ നിരീക്ഷണ ക്യാമറകളുടെ പ്രവര്‍ത്തനങ്ങളിലും പാലിക്കേണ്ടതാണ്.
