മലയാളമിത്രം വെബ് ഡസ്ക് 
സർവ്വകലാശാലകൾ വളരണമെങ്കിൽ മുഖ്യമന്ത്രിമാർ ചാൻസലർമാരാകണമെന്ന് തമിഴ്നാട് മുഖ്യമന്ത്രിയും ദ്രാവിഡ മുന്നേറ്റ കഴകം നേതാവുമായ എംകെ സ്റ്റാലിൻ. ഡോ ജെ ജയലളിത മ്യൂസിക് ആൻഡ് ഫൈൻ ആർട്‌സ് യൂണിവേഴ്‌സിറ്റിയുടെ ബിരുദദാന ചടങ്ങിൽ സംസാരിക്കുകയായിരുന്നു സ്റ്റാലിന്റെ പ്രതികരണം. സംസ്ഥാനത്തെ മുഖ്യമന്ത്രിയെ സർവകലാശാലയുടെ ചാൻസലറാക്കിയ മുൻ മുഖ്യമന്ത്രി ജെ ജയലളിതയുടെ നടപടിയെ സ്റ്റാലിൻ അഭിനന്ദിച്ചു.
“സംസ്ഥാന സർക്കാരിന്റെ പൂർണമായ ധനസഹായത്തിലാണ് ഈ സർവകലാശാല പ്രവർത്തിക്കുന്നത്. ഭരണത്തിലിരിക്കുന്ന ഒരു മുഖ്യമന്ത്രിയാണ് സർവകലാശാലയുടെ ചാൻസലർ ആകേണ്ടത്. ഞാൻ രാഷ്ട്രീയം പറയാൻ ശ്രമിക്കുന്നില്ല, യാഥാർത്ഥ്യം മാത്രമാണ് പറയുന്നത്. മുഖ്യമന്ത്രിമാർ ചാൻസലർമാരായാൽ മാത്രമേ സർവകലാശാലകൾക്ക് പുരോഗതി ഉണ്ടാകൂ. മറ്റാരെങ്കിലും ഈ സർവ്വകലാശാലയുടെ ചാൻസലർ ആയിരുന്നെങ്കിൽ അതിന്റെ അന്തസത്ത നഷ്ടപ്പെടുമായിരുന്നുവെന്ന് മുൻ മുഖ്യമന്ത്രി ജയലളിതയ്ക്ക് അറിയാമായിരുന്നു. അതിന് ഞാൻ അവരെ അഭിനന്ദിക്കുന്നു.”- സ്റ്റാലിൻ പറഞ്ഞു.
തുടർന്ന് പ്രശസ്ത ഗായകരായ പി സുശീലയ്ക്കും പി എം സുന്ദരത്തിനും അദ്ദേഹം ഓണററി ഡോക്ടറേറ്റ് കൈമാറി. രണ്ട് സംഗീത ഇതിഹാസങ്ങൾക്ക് ഡോക്ടറേറ്റ് ബിരുദം നൽകി ആദരിച്ചിട്ടുണ്ടെന്നും മുഖ്യമന്ത്രി സർവകലാശാല ചാൻസലറായതിനാൽ മാത്രമാണ് ഇത് സാധ്യമായതെന്നും സ്റ്റാലിൻ വ്യക്തമാക്കി. സ്വാതന്ത്ര്യ സമര സേനാനിയും സിപിഐ (എം) നേതാവുമായ പി ശങ്കരയ്യയ്ക്ക് ഹോണററി ഡോക്ടറേറ്റ് നൽകാൻ ഗവർണർ ആർഎൻ രവി എങ്ങനെ വിസമ്മതിച്ചുവെന്നും അദ്ദേഹം പരോക്ഷമായി സൂചിപ്പിച്ചു.
“ജനങ്ങളാൽ തിരഞ്ഞെടുക്കപ്പെട്ട മുഖ്യമന്ത്രിയ്ക്ക്, സർവകലാശാലയുടെ ചാൻസലർ എന്ന നിലയിൽ, ജനങ്ങളുടെ ആഗ്രഹം പ്രതിഫലിപ്പിക്കുന്ന തീരുമാനങ്ങൾ എടുക്കാൻ കഴിയും. അതിനാൽ, എല്ലാ സർവകലാശാലകളുടെയും ചാൻസലർ മുഖ്യമന്ത്രിയാക ണമെന്ന് ഞങ്ങൾ ആവശ്യപ്പെടുന്നു. ഇതിനായി തമിഴ്നാട് നിയമസഭയിൽ ബില്ലുകൾ പാസാക്കി. ഒരു വിവാദത്തിലും പെടാൻ ഞാൻ ആഗ്രഹിക്കുന്നില്ല. സുപ്രീം കോടതി ഈ വിഷയത്തിൽ കേസ് കേൾക്കുകയാണ്, ഞങ്ങൾ നല്ല വാർത്തകൾക്കായി കാത്തിരി ക്കുകയാണ്. ”സംസ്ഥാനങ്ങളുടെ അവകാശങ്ങൾ മുന്നോട്ട് വയ്ക്കുന്നതിനെക്കുറിച്ച് ജഡ്ജിമാർ തങ്ങളുടെ അഭിപ്രായങ്ങൾ പ്രകടിപ്പിച്ചതായും സ്റ്റാലിൻ കൂട്ടിച്ചേർത്തു.
“വിദ്യാഭ്യാസം കൺകറന്റ് ലിസ്റ്റിൽ നിന്ന് സംസ്ഥാന ലിസ്റ്റിലേക്ക് മാറ്റണം. എങ്കിൽ മാത്രമേ എല്ലാവർക്കും വിദ്യാഭ്യാസം നേടാനാകൂ. ഞാൻ തമിഴ്നാടിന് വേണ്ടിയല്ല, ഇന്ത്യയിലെ എല്ലാ സംസ്ഥാനങ്ങൾക്കും വേണ്ടിയാണ് സംസാരിക്കുന്നത്, വിദ്യാഭ്യാസം ഒരു വ്യക്തിയുടെ അവകാശമാണ്, അത് എല്ലാവർക്കും ലഭിക്കണം. അതാണ് ദ്രാവിഡിയൻ നയം.”- അദ്ദേഹം പറഞ്ഞു.
