മലയാളമിത്രം നാഷണല് ഡസ്ക് 
ഡൽഹിയിലെ ഇസ്രായേൽ എംബസിക്ക് സമീപം ഇടതു വിദ്യാർത്ഥി സംഘടനയായ എസ്.എഫ്.ഐ നടത്തിയ പലസ്തീൻ അനുകൂല മാർച്ചിൽ സംഘർഷം. പ്രതിഷേധക്കാരെ എപിജെ അബ്ദുൾ കലാം റോഡിന് സമീപം പോലീസ് തടഞ്ഞുവച്ചു. ഇവരെ പോലീസ് വലിച്ചിഴയ്ക്കുന്ന വീഡിയോ വാർത്താ ഏജൻസിയായ എഎൻഐ പങ്കുവച്ചു. പലസ്തീൻ അനുകൂല റാലിയിൽ പതാക വീശിയാണ് പ്രതിഷേധക്കാർ രംഗത്തെത്തിയത്.
ഇസ്രയേലും പലസ്തീൻ ഭീകര സംഘടനയായ ഹമാസും തമ്മിലുള്ള യുദ്ധം 16-ാം ദിവസത്തിലേക്ക് കടക്കുന്നതിനിടെയാണ് പ്രതിഷേധം. നേരത്തെ ബീഹാറിലും കൊൽക്കത്തയിലും പലസ്തീൻ അനുകൂല പ്രക്ഷോഭങ്ങൾ നടന്നിരുന്നു. ഒക്ടോബർ 13 ന് ബീഹാറിൽ നടന്ന മാർച്ചിൽ പ്രതിഷേധക്കാർ പലസ്തീൻ അനുകൂല മുദ്രാവാക്യങ്ങൾ മുഴക്കുകയും സമാനമായ പ്ലക്കാർഡുകളും ഉയർത്തുകയും ചെയ്തു. പ്രതിഷേധക്കാർ ഇസ്രായേലിന്റെ പതാകയും കത്തിച്ചു.
കൊൽക്കത്തയിൽ, ഒക്ടോബർ 12 ന് ന്യൂനപക്ഷ യുവജന ഫെഡറേഷൻ, സാമൂഹിക പ്രവർത്തകൻ മുഹമ്മദ് കമ്രുജ്ജമാന്റെ നേതൃത്വത്തിൽ പലസ്തീന് പിന്തുണ പ്രഖ്യാപിച്ച് വൻ പ്രതിഷേധം നടത്തിയിരുന്നു. ഗാസയിലെ പാർപ്പിട സമുച്ചയത്തിൽ ഇസ്രയേൽ നടത്തിയ ആക്രമണത്തിൽ 30 പലസ്‌തീനികൾ കൊല്ലപ്പെട്ടു. പലസ്തീൻ മാധ്യമങ്ങളാണ് ഇക്കാര്യം റിപ്പോർട്ട് ചെയ്‌തത്‌. ജബാലിയ അഭയാർത്ഥി ക്യാമ്പിലെ അൽ ഷുഹാദ മേഖലയിലാണ് കെട്ടിടം സ്ഥിതി ചെയ്യുന്നത്. ആക്രമണത്തിൽ കെട്ടിടം നിലംപൊത്തുകയും സമീപത്തെ നിരവധി വീടുകൾ തകരുകയും ചെയ്‌തതായി റിപ്പോർട്ടിൽ പറയുന്നു.
അതേസമയം, ഗാസയിൽ കഴിഞ്ഞ 24 മണിക്കൂറിനുള്ളിൽ ഇസ്രയേൽ നടത്തിയ വ്യോമാക്രമണത്തിൽ 117 കുട്ടികളടക്കം 266 പലസ്‌തീനികൾ കൊല്ലപ്പെട്ടതായി ഗാസ ആരോഗ്യ മന്ത്രാലയം അറിയിച്ചു. പലസ്തീൻ തീവ്രവാദി ഗ്രൂപ്പായ ഹമാസ് തെക്കൻ ഇസ്രയേലി സമൂഹങ്ങൾക്ക് നേരെ നടത്തിയ അപ്രതീക്ഷിത ആക്രമണത്തിന് ശേഷം ഇസ്രയേൽ പ്രത്യാക്രമണത്തിൽ രണ്ടാഴ്‌ചയ്ക്കിടയിൽ കുറഞ്ഞത് 4,600 പേരെങ്കിലും കൊല്ലപ്പെട്ടതായി ഗാസ അധികൃതർ അറിയിച്ചു.
